ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បញ្ជាក់ថា ក្នុង​នាម​កម្ពុជា​ធ្វើ​ជាម្ចាស់​ផ្ទះ​នៃ​កិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៃ​រដ្ឋភាគី​អនុ​សញ្ញា​អូតាវ៉ា ឆ្នាំ២០២៤នេះ កម្ពុជាកំពុងតែប្រឹង ប្រែងយ៉ាងខ្លាំង ដើម្បី​អូសទាញ​ឲ្យ​បាន​នូវ​សមាជិក​អនុ​សញ្ញា​អូតាវ៉ាថ្មីបន្ថែមទៀត ខណៈបច្ចុប្បន្នរដ្ឋភាគីនៃអនុសញ្ញាអូតាវ៉ានេះមាន ១៦៤ ប្រទេស​ជា​សមាជិក​ដោយ​នៅ​សល់ ៣៣ ប្រទេសទៀតមិនទាន់បានចូលជាសមាជិកនៅឡើយនោះ។

ឯកឧត្តម លី ធុជ លើកឡើងក្នុ​ង​ឱកាស​ដឹកនាំ​កិច្ចប្រជុំ​គណៈកម្មការ​អន្តរ​ក្រសួង​រៀបចំ​ទទួល​ធ្វើ​ជា​ម្ចាស់ផ្ទះ​នៃកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៃរដ្ឋភាគី​អនុ​សញ្ញា​អូតាវ៉ាឆ្នាំ២០២៤ នាវេលាថ្ងៃទី១០ ខែមករា ឆ្នាំ២០២៤នេះ នៅទីស្នាក់ការអាជ្ញាធរមីន ដោយ​បានបញ្ជាក់អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្រោមការ​ដឹកនាំ​ដ៏​ខ្ពង់ខ្ពស់​របស់​សម្តេច​អគ្គ​មហាសេនាបតីតេជោ ហ៊ុន សែន អតីតនាយករដ្ឋមន្រ្តី និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងការដោះស្រាយបញ្ហាមីននៅកម្ពុជា ហើយបាន​ធ្វើ​ឱ្យក​ម្ពុជា​ក្លាយ​ជា​ប្រទេ​ស​គំរូមួយលើសកលលោកផ្នែកសកម្មភាពមីន។

ឯកឧត្តម បន្តថា ការវាយតម្លៃខ្ពស់របស់រដ្ឋភាគី ១៦៤ ប្រទេស សហគមន៍អន្តរជាតិ និងការ​ទទួល​បាន​សិទ្ធិក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលសៀមរាប-អង្គរ ពិតជាបាន​ឆ្លុះ​បញ្ចាំង​អំពី​កិច្ច​ខិតខំប្រឹង ប្រែងរួមរវាងរដ្ឋាភិបាល រួមជាមួយប្រទេសជាមិត្ត និងដៃគូអភិវឌ្ឍន៍។ គណៈ​ប្រតិភូ​ជុំវិញ​ពិភពលោក នឹងមកកាន់កម្ពុជា ដែលវានឹង​ចូល​រួម​ចំណែក​ឱ្យ​មាន​កិច្ច​សហប្រតិបត្តិការ​បន្ថែមក្នុងសកម្មភាពមីននៅកម្ពុជា ក៏ដូចជានឹងផ្តល់​ឱកាស​ឱ្យ​កម្ពុជា​ផ្សព្វផ្សាយ​ពី​ផល​វិជ្ជមាន ផ្សព្វផ្សាយពីតំបន់ទេសចរណ៍ និងវប្បធម៌របស់ខ្លួនទៅកាន់ពិភពលោក។

សូម​ជម្រាបថា កិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន នៃរដ្ឋភាគី​អនុ​សញ្ញា​អូតាវ៉ា ឆ្នាំ ២០២៤  ដែលព្រះរាជាណាចក្រកម្ពុជា​ធ្វើ​ជាប្រធាន​នេះ​នឹងប្រព្រឹត្ត​ឡើង​នៅ​ថ្ងៃ​ទី​២៨-២៩ ខែវិច្ឆិកា ឆ្នាំ២០២៤ ខាងមុខនៅលើទឹកដីសៀមរាប ដែលនឹង​មាន​តំណាង​ប្រទេស​ចំនួន ១៦៤ ជាសមាជិកអនុសញ្ញានេះ មកចូលរួមប្រមាណ ៨០០នាក់៕ អត្ថបទ៖ ភារម្យ