រុស្ស៊ី៖ ប្រធានាធិបតីរុស្ស៊ី លោកវ្ល៉ាឌីមៀ ពូទីន បាននិយាយនៅថ្ងៃពុធនេះថា រុស្ស៊ីមិនស្វែងរកគុណសម្បត្តិយោធាលើនរណាម្នាក់នោះទេ ប៉ុន្តែ ខ្លួនក៏មិនអនុញ្ញាតឲ្យប្រទេសដ៏ទៃទៀតមានប្រៀបលើទីក្រុងមូស្កូនោះដែរ។
លោកពូទីន បានថ្លែងបែបនេះ នៅពេលបើកកិច្ចប្រជុំសន្តិសុខអន្តរជាតិនៅទីក្រុងមូស្កូ។ លោកបាននិយាយតាម Video Conferenceថា ពួកយើងកំពុងអភិវឌ្ឍសមត្ថភាពការពារជាតិរបស់ពួកយើង ដោយផ្អែកលើគោលការណ៍មានហេតុផលគ្រប់គ្រាន់ យើងពួកយើងមិនបានប្រឹងប្រែងឲ្យមានប្រៀបយោធាឯកតោភាគីនោះទេ គ្រាន់តែចង់ឲ្យមានតុល្យភាពប៉ុណ្ណោះ។
លោកពូទីន បន្តថា ពួកយើងមិនបណ្តោយឲ្យនរណាម្នាក់មានប្រៀបលើពួកយើងជាដាច់ខាត។ កិច្ចប្រជុំក្រុងមូស្កូប្រចាំឆ្នាំលើកទី៩ ស្តីពីសន្តិសុខអន្តរជាតិដែលរៀបចំឡើងដោយក្រសួងការពារជាតិរុស្ស៊ីនេះដែរ ត្រូវបានគេរំពឹងថានឹងមានការចូលរួមពីមន្ត្រីយោធា និងក្រុមអ្នកជំនាញជាង ២០០នាក់ មកពីបណ្តាប្រទេសចំនួន ៥០។
អគ្គលេខាធិការអង្គការសហប្រជាជាតិ(UN)លោក អង់តូនីញ៉ូ ហ្គូទែរ៉េស បានថ្លែងនៅក្នុងកិច្ចប្រជុំមួយនេះផងដែរ ដោយលោកបានធ្វើការសង្កត់ធ្ងន់ពីសារសំខាន់របស់រុស្ស៊ីក្នុងការគាំទ្រពហុភាគីនិយម នៅ UN ដើម្បីប្រឈមនឹងការងារលំបាកថ្មីបង្កឡើងដោយសារជំងឺ COVID-19 និងបញ្ហាបម្រែបម្រួលអាកាសធាតុ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
