កាលពីថ្ងៃអង្គារម្សិលមិញ រដ្ឋមន្រ្តីការបរទេសអាល្លឺម៉ង់លោកស្រី Annalena Baerbock បានអំពាវនាវឲ្យបើកព្រំដែនរយៈពេល ២៤ម៉ោងនៅច្រកព្រំដែន Rafah របស់ប្រទេសអេហ្ស៊ីប ដើម្បីអនុញ្ញាតឲ្យអង្គការជំនួយមនុស្សធម៌ មានឱកាសចូលទៅក្នុងតំបន់ហ្គាហ្សាស្រ្ទីប និងដើម្បីឲ្យប្រជាពលរដ្ឋហ្គាហ្សាទទួលបានឱសថ ។

ក្រោយធ្វើដំណើរទៅកាន់តំបន់ព្រំដែន Rafah លោកស្រី Baerbock និយាយថា ពួកយើងនឹងធ្វើអ្វីគ្រប់បែបយ៉ាងតាមដែលពួកយើងអាចធ្វើបាន ដើម្បីសម្រេចបានគោលដៅមួយនេះ ។ លោកស្រីបន្តថា ជីវិតរស់នៅក្នុងតំបន់ហ្គាហ្សាប្រៀបបាននឹងឋាននរគ ។

 លោកស្រី Baerbock និយាយថា នៅតំបន់ព្រំដែនជាមួយអេហ្ស៊ីប រថយន្ត ៣ពាន់គ្រឿងផ្ទុកដោយគ្រឿងផ្គត់ផ្គង់ជំនួយមនុស្សធម៌សម្រាប់មនុស្ស ១,៩លាននាក់នៅតំបន់ហ្គាហ្សា បានជាប់ និងមិនអាចចូលទៅក្នុងតំបន់ហ្គាហ្សាបានឡើយ ។

 លោកស្រី Baerbock បានអំពាវនាវផងដែរឲ្យបើកព្រំដែនបន្ថែមទៀតនៅអ៊ីស្រាអែល ដើម្បីអាចដឹកជញ្ជូនជំនួយពីទីនោះទៅកាន់តំបន់ហ្គាហ្សាស្រ្ទីប ។

 លោក Baerbock បានផ្តល់កញ្ចប់ជំនួយ ១០តោនសម្រាប់ជនប៉ាឡេស្ទីននៅអាកាសយានដ្ឋានស្ថិតក្នុងទីក្រុង Al-Arish ជិតច្រកឆ្លងកាត់ព្រំដែន ។ ជំនួយទាំងនេះ នឹងត្រូវបរិច្ចាគជូនក្រុមអឌ្ឍចន្ទក្រហមអេហ្ស៊ីបដែលរួមមានកន្ទេលដេក ភួយ កម្រាលដេករបស់កុមារ និងគ្រែជំរំ សម្រាប់ប្រជាពលរដ្ឋនៅក្នុងតំបន់ហ្គាហ្សា ។

 យោងតាមការិយាល័យការបរទេសសហព័ន្ធអាល្លឺម៉ង់ បានឲ្យដឹងថា ចាប់តាំងពីសង្រ្គាមផ្ទុះឡើងជាការឆ្លើយតបនឹងការវាយប្រហាររបស់ក្រុមហាម៉ាស់កាលពីថ្ងៃទី ៧ ខែតុលា អាល្លឺម៉ង់បានបង្កើនជំនួយមនុស្សធម៌របស់ខ្លួនជិត ៣ដងសម្រាប់ដែនដីប៉ាឡេស្ទីនមួយនេះ ពោលគឺមានថវិកាសរុបរហូតដល់ ២០៣លានអឺរ៉ូ ។

 សូមបញ្ជាក់ថា ច្រកព្រំដែនបច្ចុប្បន្នបើកបានអំឡុងតែពេលថ្ងៃប៉ុណ្ណោះ ហើយអ៊ីស្រាអែលតម្រូវឲ្យមានការអង្កេតផ្ទាល់ខ្លួនលើទំនិញមុនពេលចែកចាយ ។ បន្ទាប់ពីតម្រូវការបែបនេះ រថយន្តដឹកជំនួយតែងតែជាប់នៅច្រកព្រំដែន Rafah អស់រយៈពេលជាច្រើនថ្ងៃ ស្របពេលដែលអង្គការសហប្រជាជាតិ បានរាយការណ៍ពីស្ថានភាពបែបនេះផងដែរ ៕