នគរបាលបានចូលទៅក្នុងវិមានប្រធានាធិបតីរបស់ប្រទេសប៉ូឡូញ កាលពីថ្ងៃអង្គារ (ទី៩ ខែមករា) ដើម្បីឃុំខ្លួនអតីតមេរបស់ពួកគេចំនួន ២នាក់ ដោយប្រតិបត្តិតាមដីការបស់តុលាការ ដើម្បីនាំយកអតីតរដ្ឋមន្ត្រីក្រសួងមហាផ្ទៃ និងអនុប្រធានរបស់លោកទៅកាន់ពន្ធនាគារ ដែលធ្វើឲ្យជម្លោះ រវាងប្រមុខរដ្ឋ និងរដ្ឋាភិបាលថ្មីកាន់តែអាក្រក់ទៅៗ។

អ្នកតវ៉ារាប់រយនាក់ បានប្រមូលផ្ដុំគ្នានៅពីមុខវិមានរដ្ឋាភិបាល តាមការអំពាវនាវរបស់គណបក្ស PiS ដែលលោក Mariusz Kaminski និងលោក Maciej Wasik គឺជាសមាជិក និងនៅមុខប៉ុស្តិ៍នគរបាល ដែលឥស្សរជនទាំង២ ត្រូវឃុំខ្លួននៅទីនោះ។

មុននេះ នាយករដ្ឋមន្ត្រីលោក Donald Tusk បានចោទប្រកាន់ប្រធានាធិបតី លោក Andrzej Duda ថា បានរារាំងវិធានការយុត្តិធម៌ បន្ទាប់ពីសមាជិកសភាទាំង២រូប បានបង្ហាញខ្លួននៅវិមានរដ្ឋាភិបាល ដោយជំរុញឲ្យនគរបាលស្វែងរកពួកគេនៅក្នុងរថយន្តដែលចាកចេញពីវិមាន។

លោកស្រី Grazyna Ignaczak-Bandych ដែលជាប្រធាននៃអធិការបតីរបស់ប្រធានាធិបតី បានប្រាប់ទូរទស្សន៍ឯកជន TV Republika ថា នគរបាលបានចូលទៅក្នុងវិមាន ក្នុងខណៈពេលដែលលោក Duda ស្ថិតនៅឯវិមានផ្លូវការផ្សេងទៀតរបស់លោក គឺវិមាន Belweder នៅទីក្រុងវ៉ាសូវី ដោយជួបជាមួយមេដឹកនាំគណបក្សប្រឆាំងបេឡារុសដែលនិរទេសខ្លួន គឺលោកស្រី Sviatlana Tsikhanouskaya៕

ការចោទប្រកាន់លើសមាជិកសភាទាំង ២រូប គឺជាការតបតចុងក្រោយបំផុត នៅក្នុងជម្លោះ ដែលទំនងជាជាមួយក្នុងចំណោមជម្លោះជាច្រើននៃការរួមរស់ជាមួយគ្នាដែលមានរដ្ឋាភិបាល និងប្រធានាធិបតីមកពីគណបក្សនយោបាយផ្សេងៗគ្នា។ បន្ទាប់ពីទទួលបានអំណាច នៅក្នុងការបោះឆ្នោតខែតុលា លោក Tusk ដែលជាអតីតមន្ត្រីជាន់ខ្ពស់របស់សហភាពអឺរ៉ុប បានប្តេជ្ញាលុបចោលគោលនយោបាយរបស់អ្នកកាន់តំណែងមុន គឺគណបក្សជាតិនិយម ច្បាប់ និងយុត្តិធម៌ (PiS) ដែលត្រូវប្រឈមនឹងការចោទប្រកាន់ពីបទធ្វើវិទ្ធង្សនាលទ្ធិប្រជាធិបតេយ្យ ក្នុងអំឡុងពេលគ្រប់គ្រងប្រទេសរយៈពេល ៨ឆ្នាំ៕