រដ្ឋមន្ត្រីការបរទេសអង់គ្លេសលោក ដេវីត កាមេរូន (David Cameron) បាននិយាយកាលពីថ្ងៃអង្គារថា មេធាវីរដ្ឋាភិបាលអង់គ្លេស មិនជឿថា អ៊ីស្រាអែលបានបំពានច្បាប់អន្តរជាតិ ក្នុងការឆ្លើយតបផ្នែកយោធារបស់ខ្លួនចំពោះការវាយប្រហារដ៏សាហាវរបស់ក្រុមហាម៉ាសកាលពីថ្ងៃទី៧ ខែតុលានោះទេ។

ប៉ុន្តែអតីតនាយករដ្ឋមន្ត្រីរូបនេះ បានប្រាប់គណៈកម្មាធិការកិច្ចការបរទេសរបស់សភាថា រឿងរ៉ាវមួយចំនួនដែលខ្លួនបានឃើញក្នុងអំឡុងពេលសង្រ្គាម នៅក្នុងទឹកដីប៉ាឡេស្ទីនដែលត្រូវបានឡោមព័ទ្ធគឺ មានការព្រួយបារម្ភយ៉ាងខ្លាំង»។

លោកបាននិយាយថា តើខ្ញុំបារម្ភថា អ៊ីស្រាអែល បានចាត់វិធានការដែលអាចនឹងបំពាននឹងច្បាប់អន្តរជាតិដែរឬទេ ព្រោះទីតាំងពិសេសនេះ ត្រូវបានគេទម្លាក់គ្រាប់បែក ឬអ្វីក៏ដោយ?

«បាទ ពិតណាស់ ខ្ញុំបារម្ភអំពីបញ្ហានោះ។

លោកកាមេរូន ត្រូវបានរុញច្រានម្តងហើយម្តងទៀតអំពីភាពស្របច្បាប់នៃការឆ្លើយតបរបស់អ៊ីស្រាអែលចំពោះការវាយប្រហាររបស់ក្រុមហាម៉ាស ដែលបណ្តាលឲ្យមានអ្នកស្លាប់ប្រហែល ១.១៤០នាក់នៅក្នុងអ៊ីស្រាអែល ដែលភាគច្រើនជាជនស៊ីវិល នេះបើយោងតាមការចំនួនបូកសរុបរបស់សារព័ត៌មាន AFP ដោយផ្អែកលើតួលេខផ្លូវការ។

ការទម្លាក់គ្រាប់បែកឥតឈប់ឈររបស់អ៊ីស្រាអែល និងការវាយលុកថ្នើរជើងនៅតំបន់ហ្កាហ្សា ជាការឆ្លើយតប បានសម្លាប់មនុស្សយ៉ាងហោចណាស់ ២៣.២១០ នាក់ ដែលភាគច្រើនជាស្ត្រី និងកុមារ នេះបើយោងតាមក្រសួងសុខាភិបាលនៃដែនដីដែលគ្រប់គ្រងដោយក្រុមហាម៉ាស។