ក្រសួងមហាសមុទ្រ និងនេសាទកូរ៉េខាងត្បូង បានឲ្យដឹងថា ប្រទេសកូរ៉េខាងត្បូងនឹងផ្តល់ការគាំទ្រដល់ក្រុមហ៊ុននាំចេញរបស់ប្រទេស ដោយធានាដល់សមត្ថភាពដឹកជញ្ជូនបន្ថែមទៀតលើនាវា និងទីកន្លែងស្តុកទុក ចំពេលមានការព្រួយបារម្ភអំពីភាពតានតឹង នៅសមុទ្រក្រហម ដែលរំខានដល់ផ្លូវដឹកជញ្ជូន។

ផែនការរបស់ក្រសួង ដើម្បីជួយដល់វិស័យនាំចេញដ៏សំខាន់របស់កូរ៉េខាងត្បូងនេះ កើតឡើងបន្ទាប់ពីក្រុមសកម្មប្រយុទ្ធហួទីដែលគាំទ្រដោយអ៊ីរ៉ង់ នៅប្រទេសយេម៉ែន បានបង្កើនការវាយប្រហារលើនាវាដែលប្រើប្រាស់ផ្លូវដឹកជញ្ជូនអន្តរជាតិ នៅសមុទ្រក្រហម ដើម្បីជាការតវ៉ាប្រឆាំងនឹងសង្គ្រាមរបស់អ៊ីស្រាអែល នៅតំបន់ហ្កាហ្សា។

តាមរយៈសេចក្តីថ្លែងការណ៍ដែលបានចេញផ្សាយ នៅថ្ងៃពុធនេះ អនុរដ្ឋមន្ត្រីក្រសួងមហាសមុទ្រលោក Song Myeong-dal បានប្រាប់ថា៖ «ដោយជម្លោះនៅមជ្ឈិមបូព៌ាកាន់តែរាលដាល យើងមិនអាចបដិសេធនោះទេពីលទ្ធភាពនៃការរំខានស្រដៀងគ្នានេះ នៅក្នុងតំបន់ផ្សេងទៀតនៃមជ្ឈិមបូព៌ា»។

ក្រសួងបានឲ្យដឹងថា ខ្លួនមានបំណងធានាដល់សមត្ថភាពដឹកជញ្ជូនជាមុន នៅតាមក្រុមហ៊ុនដឹកជញ្ជូន ដើម្បីកាត់បន្ថយផលប៉ះពាល់នៃភាពតានតឹងសមុទ្រក្រហមលើការនាំចេញ និងការនាំចូលរបស់កូរ៉េខាងត្បូង។ លោក Song បាននិយាយថា វានឹងផ្តល់នូវជម្រើសផ្សេងទៀតដល់នាវា សម្រាប់ការនាំចេញរថយន្ត និងកន្លែងស្តុកទុកបន្ថែម ចាប់តាំងពីវិស័យរថយន្ត ត្រូវបានគេរំពឹងថា នឹងប្រឈមនឹងការរំខានខ្លាំងបំផុត។

ក្រសួងបាននិយាយថា ប្រទេសកូរ៉េខាងត្បូងមានបំណងធានាដល់ការប្រើប្រាស់ សម្រាប់នាវាកុងតឺន័រចំនួន៤ ក្នុងផ្លូវនៅអឺរ៉ុបខាងជើង និងមេឌីទែរ៉ាណេ ក្នុងពេលធ្វើដំណើរពីពាក់កណ្តាលខែមករាដល់ដើមខែកុម្ភៈ៕