អ្នកស្រុកនៅតំបន់ Noto ក្នុងខេត្ត Ishikawa របស់ប្រទេសជប៉ុន កំពុងជួបការលំបាកក្នុងការធ្វើឲ្យការរស់នៅប្រសើរដូចដើមវិញ បន្ទាប់ពីគ្រោះរញ្ជួយដីកម្រិត ៧,៦រ៉ិចទ័រ បានវាយប្រហារឧបទ្វីបនេះ។

សូមបញ្ចាក់ថា ការរញ្ជួយដ៏ខ្លាំងជាបន្តបន្ទាប់ ជាមួយនឹងការរញ្ជួយដ៏ខ្លាំងបំផុតមួយ ក្នុងចំណោមកម្រិតដំបូង ៧,៦រ៉ិចទ័រ បានវាយប្រហារឧបទ្វីប Noto កាលពីថ្ងៃទី១ ខែមករា។ មកទល់ពេលនេះ មនុស្សជាង ២០០នាក់ ត្រូវបានរាយការណ៍ថា ស្លាប់។

ផ្ទះរបស់លោក Masahiro Takahashi ស្ថិតនៅចម្ងាយមិនដល់ជាង ២០ម៉ែត្រនោះទេពីឆ្នេរសមុទ្រ។ ផ្ទះរបស់គាត់ត្រូវបានជន់លិចដោយសាររលកយក្សស៊ូណាមិ។ សម្ភារប្រើប្រាស់ក្នុងផ្ទះទាំងអស់ ដែលត្រូវបានរៀបចំទុកដាក់នៅលើឥដ្ឋ បានរងការខូចខាត។

លោក Takahashi បាននិយាយថា៖ «ខ្ញុំបានឃើញសេចក្តីរាយការណ៍អំពីរលកយក្សស៊ូណាមិ ដែលអាចមានកម្ពស់ដល់ទៅ ៥ម៉ែត្រ អំឡុងពេលរញ្ជួយដី ដូច្នេះខ្ញុំក៏បើកឡានទៅកាន់ទីទួលខ្ពស់ ដោយឡើងទៅកាន់ទីកន្លែងកម្ពស់ ៣០ម៉ែត្រភ្លាមៗ។ ក្រោយមកខ្ញុំបានឮថា រលកយក្សស៊ូណាមិបានស្រកចុះ ទើបខ្ញុំត្រឡប់ទៅផ្ទះវិញ នៅព្រឹកបន្ទាប់ តែបានត្រឹមតែមកឈរមើលផ្ទះរបស់ខ្ញុំត្រូវបានជន់លិច»។

មិនខុសពីលោក Takahashi ផងដែរ ប្រជាពលរដ្ឋក្នុងតំបន់នេះ កំពុងប្រឈមនឹងការលំបាកជាច្រើនដោយសារផលប៉ះពាល់នានា ផ្លូវខូចខាត និងការខ្វះខាតគ្រឿងសម្ភារផ្គត់ផ្គង់។ លោក Takahashi បាននិយាយថា ទឹកក្រោមដីមិនអាចប្រើប្រាស់បាននោះទេ រហូតដល់ ២ថ្ងៃកន្លងមកនេះ៕