នគរបាលនិយាយនៅថ្ងៃពុធនេះថា ខ្មាន់កាំបិទដែលបានចាក់ត្រូវក.មេដឹកនាំគណបក្សប្រឆាំងកូរ៉េខាងត្បូងលោក Lee Jae-myung បានបើកការវាយប្រហាររបស់ខ្លួនដោយមានគោលបំណងចង់បញ្ឈប់លោក Lee ពីការក្លាយជាប្រធានាធិបតីកូរ៉េខាងត្បូង ។

លោក Lee គឺជាអតីតបេក្ខភាពប្រធានាធិបតីដែលបានចាញ់ការបោះឆ្នោតឆ្នាំ ២០២២ក្នុងសំឡេងភាគតិចជាមួយលោកប្រធានាធិបតីអភិរក្សនិយម Yoon Suk Yeol បានរងការវាយប្រហារកាលពីថ្ងៃអង្គារសប្តាហ៍មុន នៅទីក្រុងកំពង់ផែភាគត្បូង Busan ដោយបុរសវ័យ ៦៧ឆ្នាំម្នាក់ ដែលបានរត់សំដៅមករករូបលោកមានកាន់កូនកាំបិតបោះជំរំ ក្រោយសុំហត្ថលេខារបស់លោក ។

ក្រុមគ្រូពេទ្យវះកាត់ បានវះកាត់លោក Leeអស់រយៈពេលជាង ២ម៉ោង ដើម្បីជួសជុលសរសៃបំពង់ក.នៅត្រង់ក.របស់លោក ហើយមេដឹកនាំប្រឆាំងរូបនេះ បានចេញពីមន្ទីរពេទ្យនៅព្រឹកថ្ងៃពុធនេះ ។

ថ្លែងនៅក្នុងសន្និសីទសារព័ត៌មាន ស្នងការនគរបាលក្រុង Busan លោក Woo Cheol-mun និយាយថា ជនសង្ស័យដែលមិនត្រូវបានប្រាប់ឈ្មោះដោយក្រុមអាជ្ញាធរ និយាយប្រាប់នគរបាលថា គាត់ចង់រារាំងលោក Leeពីការក្លាយជាប្រធានាធិបតី ហើយនិងគណបក្សរបស់លោកពីការឈ្នះឆ្នោត ។

ទីភ្នាក់ងារព័ត៌មាន Yonhap រាយការណ៍ថា នគរបាល បានចាប់ខ្លួនបុរសម្នាក់ផ្សេងទៀត ដែលមានអាយុជាង ៧០ឆ្នាំ នៅទីក្រុងភាគកណ្តាល Asan ជាកន្លែងដេលជនសង្ស័យរស់នៅ ដែលរងការចោទប្រកាន់ថាបានជួយផ្ញើលិខិតសរសេរដោយជនសង្ស័យពីមូលហេតុនៅពីក្រោយការវាយប្រហារដល់នគរបាល ៕