ប្រទេសចិន នៅថ្ងៃពុធ (ទី១០ ខែមករា) នេះ បានចោទប្រកាន់គណបក្សកាន់អំណាចរបស់កោះតៃវ៉ាន់ថា «បានប្រឌិដ្ឋការភ័យខ្លាចឡើង» បន្ទាប់ពីអាជ្ញាធររបស់កោះនេះបានចេញសេចក្ដីប្រកាសអាសន្នថ្នាក់ជាតិ ជុំវិញការបាញ់បង្ហោះផ្កាយរណបដោយទីក្រុងប៉េកាំង។

សំឡេងទូរស័ព្ទ នៅទូទាំងកោះតៃវ៉ាន់ បានរោទ៍ឡើងជាមួយនឹង «ការប្រកាសអាសន្នកម្រិតខ្ពស់» កាលពីរសៀលថ្ងៃអង្គារ (ទី៩ ខែមករា) ក្នុងរង្វង់ពេលដែលទីក្រុងប៉េកាំងបានប្រកាសពីការបាញ់បង្ហោះដោយជោគជ័យនៃផ្កាយរណប Einstein Probe ដែលខ្លួននិយាយថា នឹងប្រមូលទិន្នន័យតារាសាស្ត្រ។

នៅពេលត្រូវបានសួរអំពីការប្រកាសអាសន្ននេះ នៅថ្ងៃពុធ អ្នកនាំពាក្យក្រសួងការបរទេសចិន លោកស្រី Mao Ning បានចោទប្រកាន់គណបក្សកាន់អំណាចរបស់កោះតៃវ៉ាន់ គឺគណបក្សប្រជាធិបតេយ្យជឿនលឿន (DPP) ថា បានសារបញ្ហាភ័យខ្លាចនេះឡើង។ លោកស្រីបាននិយាយថា៖ «ខ្ញុំគិតថា មនុស្សគ្រប់គ្នាដឹងច្បាស់ពីគោលបំណងអ្វីដែលអាជ្ញាធររបស់គណបក្ស DPP កំពុងគិត ដើម្បីបំភ័ន្តសាធារណជន»។

ប្រទេសចិនអះអាងថា កោះតៃវ៉ាន់គ្រប់គ្រងដោយខ្លួនឯងដែលត្រូវរៀបចំការបោះឆ្នោត នៅថ្ងៃសៅរ៍ចុងសប្ដាហ៍នេះ ជាផ្នែកនៃទឹកដីរបស់ខ្លួន ហើយបានប្តេជ្ញាដណ្តើមយកកោះនេះ នៅថ្ងៃណាមួយ។ ការបោះឆ្នោតនេះកំពុងត្រូវបានឃ្លាំមើលយ៉ាងកៀកកិត ក្នុងនោះរួមទាំងពីអ្នកបង្កើតគោលនយោបាយ នៅទីក្រុងប៉េកាំង និងវ៉ាស៊ីនតោនផងដែរ ដោយសារលទ្ធផលរបស់វានឹងជះឥទ្ធិពលដល់អនាគតនៃទំនាក់ទំនងរបស់កោះតៃវ៉ាន់ជាមួយនឹងប្រទេសចិន ដែលកាន់តែបង្ហាញការអះអាងរបស់ខ្លួនកាន់តែខ្លាំងឡើងៗ៕