នៅថ្ងៃពុធនេះ ក្រុមគ្រូពេទ្យពេញសិទ្ធិអង់គ្លេស បានចាប់ផ្តើមកូដកម្មរយៈពេល ៦ថ្ងៃតវ៉ាទាមទារឲ្យដំឡើងប្រាក់បៀវត្សរ៍ ដែលជាកូដកម្មមានរយៈពេលយូរបំផុតនៅក្នុងប្រវត្តិសាស្រ្ត ៧៥ឆ្នាំនៃសេវាកម្មសុខភាពជាតិ(NHS)គ្រប់គ្រងដោយរដ្ឋមួយនេះ ដែលធ្វើឲ្យប៉ះពាល់ដល់ការថែទាំអ្នកជំងឺ អំឡុងតម្រូវការកើនឡើងកម្រិតកំពូលនារដូវរងា ។

 រូបភាពវីដេអូឃ្លីបឃើញ ក្រុមគ្រូពេទ្យពេញសិទ្ធិ បានប្រមូលផ្តុំគ្នាតាមខ្សែកូដកម្មនៅទីក្រុង Nottingham, Birmingham, Newcastle និងទីក្រុង Liverpool ។

 ដូចគ្នានៅក្នុងវិស័យសំខាន់ៗផ្សេងទៀតដែរនារយៈពេល ១ឆ្នាំកន្លងមកនេះ ក្រុមគ្រូពេទ្យពេញសិទ្ធិតំណាងឲ្យក្រុមសហជីបសមាគមសុខាភិបាលអង់គ្លេស បានធ្វើកូដកម្មជាបន្តបន្ទាប់ ដើម្បីទាមទារប្រាក់បៀវត្សរ៍ល្អប្រសើរជាងនេះ ពេលប្រឈមអតិផរណាកើនឡើង ។

 នៅក្នុងសេចក្តីថ្លែងការណ៍ ក្រុមសហជីបមួយនេះ បានជំរុញឲ្យរដ្ឋាភិបាលផ្តល់ប្រាក់បៀវត្សរ៍ដែលអាចទុកចិត្តបាន ដើម្បីបញ្ចប់កូដកម្មដែលបានគំរាមកំហែងដល់ការកើនឡើងសំពាធលើសេវាកម្មសុខភាព ជាទីដែលមនុស្សជាង ៧,៧លាននាក់ រងចាំបញ្ជីទទួលការព្យាបាល ៕