ការសិក្សាដោយសមាគមឌីជីថលអាល្លឺម៉ង់ Bitkom នៅថ្ងៃពុធ (ទី១០ ខែមករា) នេះ បានបង្ហាញថា វិស័យព័ត៌មានវិទ្យា និងទូរគមនាគមន៍ (ITC) របស់ប្រទេសអាល្លឺម៉ង់ ត្រូវបានគេរំពឹងថា នឹងមានការកើនឡើងក្នុងល្បឿនដ៏លឿន នៅឆ្នាំនេះ និងយកឈ្នះលើសេដ្ឋកិច្ចអាល្លឺម៉ង់ដែលកំពុងមានបញ្ហា។

យោងតាមការសិក្សានេះ បានឲ្យដឹងថា គេរំពឹងថា ប្រាក់ចំណូលរបស់វិស័យនេះ នឹងកើនឡើង ៤,៤ភាគរយ ពោលគឺកើនដល់ ២២៤,៣ពាន់លានអឺរ៉ូ (២៤៥,០៩ពាន់លានដុល្លារ) បើធៀបនឹងការកើនឡើង ២,០ភាគរយ កាលពីឆ្នាំមុន។

ប្រធានសមាគម Bitkom លោក Ralf Wintergerst បាននិយាយថា៖ «ទោះបីជាស្ថិតនៅក្រោមលក្ខខណ្ឌសេដ្ឋកិច្ចដ៏លំបាក ដែលត្រូវបានកំណត់លក្ខណៈដោយវិបត្តិភូមិសាស្ត្រនយោបាយ និងការកាត់បន្ថយថវិកាក៏ដោយ ក៏ការលក់ និងការងារ (ក្នុងរង្វង់វិស័យនេះ) កំពុងកើនឡើង»។

តែទោះជាយ៉ាងណា កំណើនដែលបានព្យាកររបស់ឧស្សាហកម្មនេះ សម្រាប់ឆ្នាំនេះ គឺមានភាពយឺតយ៉ាវ បើប្រៀបធៀបទៅនឹងប្រទេសផ្សេងទៀត ក្នុងនោះរួមទាំងប្រទេសឥណ្ឌាផងដែរ ដែលមានកើនឡើងដល់ ៧,៩ភាគរយ សហរដ្ឋអាមេរិករំពឹងថា នឹងកើនឡើង ៦,៣ភាគរយ ហើយប្រទេសចិន ដែលត្រូវបានប៉ាន់ស្មានថា នឹងកើនឡើង ៥,៧ភាគរយ។

យោងតាមការប៉ាន់ប្រមាណរបស់មូលនិធិរូបិយវត្ថុអន្តរជាតិ (IMF) បានឲ្យដឹងថា សេដ្ឋកិច្ចរបស់ប្រទេសអាល្លឺម៉ង់ទាំងមូល ត្រូវបានគេរំពឹងថា នឹងកើនឡើងត្រឹមតែ ០,៩ភាគរយ នៅឆ្នាំ២០២៤ ដែលនៅតែទាបជាងមធ្យមភាគ ១,៤ភាគរយ សម្រាប់បណ្ដាប្រទេសមានសេដ្ឋកិច្ចជឿនលឿន៕