មន្ត្រីនគរបាលបានដង្ហែតាមឡានក្រុងបើកដំបូលឆ្លងកាត់ទីក្រុងប៉ារីស នៅថ្ងៃពុធ (ទី១០ ខែមករា) នេះ ដើម្បីជំរុញឲ្យអាជ្ញាធរពន្លឿនការពិភាក្សាអំពីលក្ខខណ្ឌការងារ និងប្រាក់ឈ្នួល ក្នុងអំឡុងព្រឹត្តិការណ៍កីឡាអូឡាំពិកឆ្នាំ២០២៤ ដែលនឹងប្រព្រឹត្តទៅនៅរដ្ឋធានីនៃប្រទេសបារាំង។

លោក Gregory Joron ប្រធានសហជីព SGP Police FO បានប្រាប់វិទ្យុ Sud Radio ថា៖ «នេះគឺជាកិច្ចប្រឹងប្រែងក្រើនរំលឹកមួយទៅកាន់អាជ្ញាធរ ដើម្បីនិយាយថា ៦ខែមុនព្រឹត្តិការណ៍នេះ (អូឡាំពិក) កងកម្លាំងនគរបាល មិនដឹងថា រដូវក្តៅនឹងទៅជាយ៉ាងណាសម្រាប់ពួកគេនោះទេ»។ លោកបានបន្ថែមថា៖ «លក្ខខណ្ឌ សម្រាប់កម្លាំងនគរបាល ក្នុងព្រឹត្តិការណ៍អូឡាំពិក គឺមិនល្អទេ»។

លោក Joron បានរំលឹកឡើងវិញនូវការទាមទារឲ្យមានភាពច្បាស់លាស់អំពីលក្ខខណ្ឌការងារ និងជាពិសេស សម្រាប់ប្រាក់រង្វាន់ ១.៥០០អឺរ៉ូ (១.៦៤១ដុល្លារអាមេរិក) សម្រាប់មន្រ្តីនគរបាលទាំងអស់។ សហជីពនគរបាលបានអំពាវនាវឲ្យធ្វើកូដកម្ម នៅថ្ងៃទី១៨ ខែមករា ដើម្បីសម្ដែងពីការមិនពេញចិត្តនៅមុនការប្រកួតកីឡាដ៏ធំនេះ។

មន្ត្រីនគរបាល និងទាហានប្រមាណ ៣០.០០០នាក់ នឹងត្រូវបានចល័តដើម្បីធានាសន្តិសុខពិធីបើក នៅថ្ងៃទី២៦ ខែកក្កដា នៅពេលដែលមនុស្សប្រហែល ៦០០.០០០នាក់ ត្រូវបានគេរំពឹងថា នឹងបានឃើញក្រុមអត្តពលិក និងគណៈប្រតិភូជិះទូកបណ្ដែតតាមដងទន្លេសែន៕