ក្រុមប្រឹក្សាសន្តិសុខអង្គការសហប្រជាជាតិបានទាមទារកាលពីថ្ងៃពុធ ទី១០ មករា ឱ្យបញ្ចប់​ជា​បន្ទាន់​ចំពោះ​ការវាយប្រហារដោយពួកឧទ្ទាមហ៊ួទី (Houthi) របស់​ប្រទេស​យេម៉ែន​លើ​ការ​ដឹកជញ្ជូន​នៅ​សមុទ្រក្រហម។

សេចក្ដីសម្រេចនេះបានអនុម័ត ដោយទាមទារឱ្យក្រុម​ឧទ្ទាម​ហ៊ួទី​បញ្ឈប់​ជា​បន្ទាន់​រាល់​ការ​វាយ​ប្រហារ​ទាំង​នេះ ដែលរារាំងពាណិជ្ជកម្មពិភពលោក និងប៉ះពាល់ដល់សិទ្ធិ និងសេរីភាពនាវាចរណ៍ ព្រម​ទាំងសន្តិភាព និងសន្តិសុខក្នុងតំបន់។ សេចក្ដី​សម្រេចនេះ ត្រូវបានអនុម័តបន្ទាប់ពីរុស្ស៊ី ចិន ម៉ូហ្សំប៊ិក និងអាល់ហ្សេរី អនុបវាទ។

ការ​​វាយប្រហារកាន់តែខ្លាំង បានបង្ខំឱ្យក្រុមហ៊ុនដឹកជញ្ជូនឆ្លងកាត់នានាធ្វើដំណើរផ្លូវផ្សេង ដោយ​ងាក​ទៅធ្វើដំណើរតាមផ្លូវទឹក Cape of Good Hope របស់អាហ្វ្រិកខាងត្បូង ដែល​ត្រូវ​បន្ថែម​ពេល​វេលា និងការចំណាយយ៉ាងច្រើនក្នុងការធ្វើដំណើរ។

អង្គការ​សហប្រជាជាតិ បាននិយាយថ្មីៗនេះថា ខ្លួននៅតែមាន​ការ​ព្រួយ​បារម្ភ​យ៉ាង​ខ្លាំង​អំពី​ស្ថាន​ភាព​នៅ​សមុទ្រក្រហម មិនត្រឹមតែស្ថានភាពនៅក្នុងសមុទ្រនោះប៉ុណ្ណោះទេ ថែមទាំង​ហានិភ័យ​ប៉ះពាល់​ដល់​ពាណិជ្ជកម្មពិភពលោកទៀតផង។ 

យោងតាមអត្ថបទ​ដែលសារព័ត៌មាន AFP ទទួលបាន សេចក្ដីសម្រេចនេះ ថ្កោលទោសក្នុងលក្ខខណ្ឌ​ដ៏​ខ្លាំង​ក្លា​បំផុ​ត​ចំពោះ​ការ​វាយ​ប្រហារ​រប​ស់​ក្រុម​ហ៊ួទី​យ៉ាង​ហោច​ណាស់​ជាង ២០លើក លើនាវាជំនួញ និងនាវាពាណិជ្ជកម្ម ចាប់តាំងពីថ្ងៃទី ១៩ ខែវិច្ឆិកា ឆ្នាំ ២០២៣ មក នៅពេលក្រុមឧទ្ទាមហ៊ួទី បានវាយប្រហារ និងរឹបអូសយក នាវា Galaxy Leader និង​ក្រុម​នាវិក៕