ក្រសួងរ៉ែ និងថាមពល ដែលមានមន្ទីររ៉ែ និងថាមពល ខេត្តត្បូងឃ្មុំជាសេនាធិការ សហការជាមួយអាជ្ញាធរមានសមត្ថកិច្ច បើកយុទ្ធនាការបង្ក្រាបការធ្វើអាជីវកម្មរ៉ែមាសអនាធិបតេយ្យ នៅថ្ងៃទី១០ ខែមករានេះ ស្ថិតនៅក្នុងភូមិ សំពៅលូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ ដោយបានបញ្ឈប់ទាំងស្រុងនូវរាល់សកម្មភាពខុសច្បាប់ទាំងនោះ។
ក្រសួងរ៉ែ និងថាមពល ចេញសេចក្ដីប្រកាសព័ត៌មាន អំពីយុទ្ធនាការបង្ក្រាបអាជីវកម្មរ៉ែមាសអនាធិបតេយ្យ ស្ថិតនៅភូមិសំពៅលូន ឃុំជាំតាម៉ៅ ស្រុកមេមត់ ខេត្តត្បូងឃ្មុំ ដែលមានការអាជីវកម្មរ៉ែមាសបែបលក្ខណៈគ្រួសារតាំងពីអំឡុងឆ្នាំ១៩៩០ ដោយមានប្រជាពលរដ្ឋ មូលដ្ឋានប្រកបរបរជីកយក និងរែងមាសដោយដៃតាមលក្ខណៈគ្រួសារ, តែនៅប៉ុន្មានឆ្នាំចុងក្រោយ មានការប្រែប្រួលពីលក្ខណៈគ្រួសារ ដែលធ្វើដោយដៃ និងឧបករណ៍សាមញ្ញ ទៅជាប្រើគ្រឿងចក្រ រំសេវជាតិផ្ទុះ និងសារធាតុគីមី ដោយកន្លែងខ្លះមានជីករូងជាអណ្ដូងរ៉ែក្រោមដី។
បញ្ហាទាំងនោះ នៅក្នុងឆ្នាំ២០២១ និងឆ្នាំ ២០២៣ រដ្ឋបាលខេត្តត្បូងឃ្មុំ បានបង្កើតជាក្រុមការងារចម្រុះថ្នាក់ខេត្ត ចុះអនុវត្តនូវវិធាន ការផ្សព្វផ្សាយទិដ្ឋភាពច្បាប់ដល់ប្រជាពលរដ្ឋ និងធ្វើការបិទទីតាំងរ៉ែមាសអនាធិបតេយ្យទ្រង់ទ្រាយធំមួយចំនួន, ប៉ុន្តែការបង្ក្រាបទីតាំងអាជីវ កម្មរ៉ែអនាធិបតេយ្យនៅតំបន់នេះនាពេលកន្លងមក ប្រៀបដូចជាការវែកចក។ ជាក់ស្ដែងនាពេលបច្ចុប្បន្នសកម្មភាពអាជីវកម្មរ៉ែមាសអនាធិបតេយ្យនៅតំបន់នោះ មានការប្រើប្រាស់ឧបករណ៍ទំនើបៗ សារធាតុគីមី រំសេវជាតិផ្ទុះ បំបែកថ្ម និងជីកលុងអណ្ដូងរ៉ែក្រោមដីប្រកបដោយ គ្រោះថ្នាក់បំផុត។ សកម្មភាពអាជីវកម្មអនាធិបតេយ្យនេះ កំពុងបង្កឱ្យមានការបាត់បង់ទ្រព្យសម្បត្តិ និងចំណូលជាតិ ប៉ះពាល់យ៉ាងធ្ងន់ធ្ងរដល់ បរិស្ថាន បង្កជាហានិភ័យខ្ពស់ដល់សុខភាព និងសុវត្ថិភាពរបស់អ្នកធ្វើអាជីវកម្មរ៉ែអនាធិបតេយ្យខ្លួនឯង ព្រមទាំងប្រជាពលរដ្ឋនៅក្នុង និងក្រៅ មូលដ្ឋាន។
តាមសកម្មភាពខាងលើ, នៅថ្ងៃទី១០ ខែមករា នេះ ក្រសួងរ៉ែ និងថាមពល ដែលមានមន្ទីររ៉ែ និងថាមពលខេត្តត្បូងឃ្មុំ ជាសេនាធិការ សហការជាមួយរដ្ឋបាលខេត្តត្បូងឃ្មុំ ក្រោមកិច្ចសម្របសម្រួលរបស់ស្ថាប័នអយ្យការ ខេត្តត្បូងឃ្មុំ បានបើកប្រតិបត្តិការដោះស្រាយទ្រង់ទ្រាយធំ នៅលើទីតាំងអាជីវកម្មរ៉ែមាសអនាធិតេយ្យនោះតែម្តង។
សូមបញ្ជាក់ថា ទាក់ទិងតំបន់សំពៅលូននេះ នាពេលកន្លងមក ក្រសួងរ៉ែ និងថាមពល បានចេញលិខិតជូនដំណឹង ស្តីពីការបើកតំបន់សម្បទាន ស្វែងរុករករ៉ែ ក្នុងនោះក្រុមហ៊ុន Renaissance Minerals ដែលកំពុងទទួលបានជោគជ័យនៅតំបន់អូរខ្វាវ ឃុំចុងផ្លាស់ ស្រុកកែវសីមា ខេត្តមណ្ឌលគីរី, ត្រូវបានជ្រើសរើស ដោយក្រុមហ៊ុនមួយនេះទទួលអាជ្ញាបណ្ណស្វែងរុករករ៉ែលោហៈ ដើម្បីធ្វើការសិក្សាស្រាវជ្រាវរ៉ែលោហៈ នៅតំបន់សំពៅលូន ក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ ដែលអាជ្ញាបណ្ណនោះ មានសុពលភាពរយៈពេល៣ឆ្នាំ ដោយគិតចាប់ពីខែមករា ឆ្នាំ២០២១ ដល់ខែមករា ឆ្នាំ២០២៤ នេះ៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
