ឯកឧត្តម ឧបនាយករដ្ឋមន្រ្តី ស៊ុន ចាន់ថុល នឹងអញ្ជើញជួបពិភាក្សាជាមួយក្រុមហ៊ុន AIAI ដើម្បី​ដោះស្រា​យតម្លៃសេវាចេញ-ចូលអាកាសយានដ្ឋានយន្តហោះអន្តរជាតិសៀមរាប-អង្គរ។

បន្ទាប់​ពីមានប្រជាពលរដ្ឋបង្ហាញការត្អូញត្អែរនូវតម្លៃសេវាចេញ-ចូល​អាកាស​យានដ្ឋាន​យន្ត​ហោះអន្ត​រជាតិសៀមរាប-អង្គរ នៅថ្ងៃទី១០ ខែមករា ឆ្នាំ២០២៤ ម្សិលមិញ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជា​ប្រធាន​ក្រុម​ការងារ​ចំពោះ​កិច្ច​ដោះស្រាយតម្លៃសេវាប្រើប្រាស់ផ្លូវចូល-ចេញអាកាសយានដ្ឋានអន្តរជាតិសៀមរាប-អង្គរ និងតម្លៃចំណត បានអញ្ជើញដឹកនាំក្រុមការងាររួមមាន ឯកឧត្តម​រដ្ឋ​មន្ត្រី​ក្រសួង​សាធារណការ និងដឹកជញ្ជូន ឯកឧត្តមរដ្ឋមន្ត្រីទទួលបន្ទុកអាកាសចរណ៍ស៊ីវិល ឯកឧត្តម​អគ្គ​លេខាធិការ នៃ​អគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា អភិបាលរងខេត្តសៀមរាប និង​បណ្ដា​ថ្នាក់​ដឹកនាំក្រសួងស្ថាប័នដែលជាសមាជិកក្រុមការងារចំពោះកិច្ច និងដោយ​មាន​ការ​ទទួល​ស្វាគមន៍​ពី​លោកអគ្គនាយករងក្រុមហ៊ុន Angkor International Airport Investment (Cambodia)​ Co., Ltd. (AIAI) ចុះពិនិត្យទីតាំង​ផ្ទាល់នៅ​អាកាសយានដ្ឋាន​អន្តរជាតិ​សៀមរាប-អង្គរ ដើម្បីប្រមូលព័ត៌មានគ្រប់ជ្រុងជ្រោយ សម្រាប់ជា​ធាតុ​ចូល​ក្នុង​ការ​ផ្តល់ដំ​ណោះ​ស្រា​យ​សមស្របលើតម្លៃសេវាប្រើប្រាស់ផ្លូវចូល-ចេញអាកាសយានដ្ឋានអន្តរជាតិសៀមរាប-អង្គរ និង​តម្លៃចំណត ជូនបងប្អូនប្រជាពលរដ្ឋ។

យោងតាមស្មារតីនៃកិច្ចប្រជុំកិច្ចប្រជុំក្រុមការងារចំពោះកិច្ចកាលពីថ្មីៗនេះ បន្ទាប់​ពី​ការ​ចុះ​ពិនិត្យ​ទីតាំង​អាកាសយានដ្ឋានអន្តរជាតិសៀមរាប-អង្គររួចរាល់ ក្រុមការងារចំពោះ​កិច្ច​នឹង​ជួប​ពិភាក្សា​ជា​មួយ​ក្រុមហ៊ុន AIAI ដើម្បីរួមគ្នាស្វែងរកដំណោះស្រាយសមស្របរួមមួយ។

សូមជម្រាបថា កាលពីដើមខែមករានេះ មានប្រជាពលរដ្ឋប្រកបអាជីវកម្មសេដ្ឋកិច្ចក្រៅប្រព័ន្ធ ឬជា​អ្នកបើកបរដឹកអ្នកដំណើរទៅកាន់អាកាសយានដ្ឋានយន្តហោះអន្តរជាតិសៀមរាប-អង្គរ បង្ហោះ​អំពីការចំណាយ២ដងមុនការធ្វើដំណើរចូលដល់ទីតាំងអាកាសយានដ្ឋាន ដោយ​តម្រូវ​ឲ្យ​មាន​ការ​បង់ថ្លៃលើសេវាធ្វើដំណើរ និងថ្លៃចំណតផងដែរ៕ អត្ថបទ សេក ឧត្តម