ឯកឧត្តម លី ធុជ ទេសរដ្ឋមន្ត្រីទទួលបន្ទុកបេសកកម្មពិសេសរបស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា បានស្នើដល់មិត្តកូរ៉េ បន្តជួយបណ្តុះបណ្តាលធនធានមនុស្ស និងផ្តល់សម្ភារៈបរិក្ខាពេទ្យបន្ថែមទៀតដល់មន្ទីរពេទ្យកុមារជាតិ ដើម្បីចូលរួមលើកកម្ពស់សុខមាលភាពកុមារកម្ពុជាឱ្យកាន់តែប្រសើរថែមទៀត។
ថ្លែងក្នុងឱកាសពិធីប្រគល់ទទួលអំណោយម៉ាស៊ីនលាងឈាម CRRT សម្រាប់កុមារកាលពីរសៀលថ្ងៃទី១០ ខែមករា ឆ្នាំ២០២៤ ឯកឧត្តម លី ធុជ ទេសរដ្ឋមន្ត្រីទទួលបន្ទុកបេសកកម្មពិសេសរបស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា បានបន្តថាការជំរុញឱ្យផ្តល់ការបណ្តុះបណ្តាល និងផ្តល់សម្ភារៈបរិក្ខាពេទ្យដល់មន្ទីរពេទ្យកុមារជាតិនេះដោយសារមន្ទីរពេទ្យកុមារមួយនេះបានដើរតួនាទីយ៉ាងសំខាន់ក្នុងការជួយពិនិត្យព្យាបាលជំងឺ និងសង្គ្រោះកុមារនៅកម្ពុជា។ ខណៈការជួយដល់មន្ទីរពេទ្យកុមារជាតិជាការជួយដ៏មានតម្លៃ ដើម្បីជួយដល់កុមារាកុមារីដែលតំណាងឱ្យអនាគត នៃកម្ពុជា។
ឯកឧត្តមទេសរដ្ឋមន្ត្រី សង្ឃឹមថា កូរ៉េនឹងបន្តជួយបណ្តុះបណ្តាល និងផ្តល់សម្ភារបរិក្ខាពេទ្យសំខាន់ៗបន្ថែមទៀតដល់មន្ទីរពេទ្យកុមារជាតិ ដើម្បីលើកកម្ពស់សមត្ថភាពបុគ្គលិកសម្រាប់ឆ្នាំ២០២៤នេះ និងឆ្នាំទៅមុខបន្តទៀត ដើម្បីជួយដល់សុខមាលភាពប្រជាពលលរដ្ឋកម្ពុជាពិសេសកុមារឱ្យកាន់តែប្រសើរឡើងបន្ថែមទៀតស្រមតាមគោលនយោបាយរបស់រាជរដ្ឋាភិបាលសម្រាប់នីតិកាលទី៧ នៃរដ្ឋសភានេះ។
ឯកឧត្តមវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ បានថ្លែងអំណរគុណចំពោះ រ៉ូតារី ក្លឹប អ៊ិនធើណាស់សិនណាល់ ដែលបានជួយបណ្តុះបណ្តាលដល់បុគ្គលិករបស់មន្ទីរពេទ្យកន្លងមកហើយឯកឧត្តម សង្ឃឹមថា រ៉ូតារី ក្លឹប អ៊ិនធើណាស់សិនណាល់ នឹងបន្តជួយបណ្តុះបណ្តាលជាបន្តទៀត។
លោកជំទាវ គ្រុយ លាងស៊ីម អនុរដ្ឋលេខាធិការក្រសួងសុខាភិបាល បានលើកឡើងថា ក្រសុខាភិបាល តែងតែយកចិត្តទុកដាក់ខ្លាំង លើការលើកកម្ពស់ការផ្តល់សេវាល្អ និងមានគុណភាពជូនអតិថិជន រួមជាមួយការបង្កើនគុណភាពការធ្វើរោគវិនិច្ឆ័យផងដែរហើយមន្ទីរពេទ្យកុមារជាតិ ជាមន្ទីរពេទ្យថ្នាក់ជាតិមួយ ដែលជំនាញលើផ្នែក ព្យាបាលរោគកុមារ និងមានការកោតសរសើរច្រើនពីសំណាក់អតិថិជនកន្លងមក។លោកជំទាវ បានរំលឹកថា មន្ទីរពេទ្យកុមារជាតិបានចាប់ផ្តើមប្រតិបត្តិការចាប់តាំងពីឆ្នាំ១៩៨០ក្រោមជំនួយ របស់អង្គការ World Vision ដោយមានគ្រូពេទ្យខ្មែរតែមួយរូប និង ក្រុម បេសកកម្មរបស់អង្គការទស្សនពិភពលោក មានចំនួន៤រូប គឺ វេជ្ជបណ្ឌិត ២រូប អ្នកបច្ចេកទេសមន្ទីរពិសោធន៍១រូប និងគិលានុបដ្ឋាយិកា១រូប តែប៉ុណ្ណោះ។
សូមជម្រាបថា បច្ចុប្បន្ននេះ មន្ទីរពេទ្យមានផ្នែករហូតដល់ទៅ ២៣ផ្នែក ដែលបានផ្តល់សេវាជូនប្រជាជន និងបុគ្គលិកប្រមាណជាង៦០០នាក់។ ជាពិសេសការផ្តល់ម៉ាស៊ីនលាងឈាមនាពេលនេះ នឹងជួយពង្រឹងការព្យាបាលកុមារ បន្ថែមលើការងារសព្វថ្ងៃ។ ចំណែកតំណាងរ៉ូតារី ក្លឹប អ៊ិនធើណាស់បានលើកឡើងថា ការផ្តល់ម៉ាស៊ីនលាងឈាមសម្រាប់កុមារនាពេលនេះ គឺដើម្បីជួយសម្រួលដល់ការព្យាបាលជំងឺកុមារឱ្យកាន់តែប្រសើរថែមទៀត៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
