អូឡាំពិក៖ កីឡាការិនី ស៊ន សៀវម៉ី និងអតីតកីឡាការិនីជម្រើសជាតិហែលទឹក ហែមថុន វិទិនី បានសម្ដែងនូវក្ដីរីករាយ ក្រោយទទួលបានការផ្ដល់ឱកាសពីគណៈកម្មាធិការជាតិអូឡាំពិកកម្ពុជា ចូលរួមចែករំលែកបទពិសោធន៍ និងបទបង្ហាញមួយចំនួនអំពីការហាត់ប្រាណនៅផ្ទះ ក្នុងកម្មវិធីទិវាអូឡាំពិកលើកទី១២៧ ឆ្នាំ២០២១ កាលពីល្ងាចថ្ងៃទី២៣ ខែមិថុនា ហើយបានចាត់ទុកកម្មវិធីនេះគឺជាការដាស់ស្មារតី ប្រជាពលរដ្ឋឲ្យចូលរួមលេងកីឡាកាន់តែច្រើន ដើម្បីទទួលបានសុខភាពល្អផង និងចូលរួមយុទ្ធនាការដំណើរឆ្ពោះទៅស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជាផង។
អតីតម្ចាស់មេដាយមាសកីឡាអាស៊ីឆ្នាំ២០១៤ និងជាម្ចាស់មេដាយកីឡាស៊ីហ្គេម ៣ជំនាន់ ស៊ន សៀវម៉ី បានលើកឡើងថា ស្របតាមពាក្យស្លោក “ប្រជាជនម្នាក់លេងកីឡាមួយមុខ” ទិវាអូឡាំពិកនឹងដាក់ស្មារតីប្រជាពលរដ្ឋ និងយុវជនគ្រប់រូបឲ្យងាយមកលេងកីឡា។ ម្យ៉ាងស្ថិតក្នុងបរិបទកូវីដ-១៩ ការលេងកីឡានឹងផ្ដល់នូវអត្ថប្រយោជន៍ជាច្រើនលើសុខភាព ដែលអាចចៀសឆ្ងាយពីជំងឺរាតត្បាតជាសកលនេះ ហើយថែមទាំងជាកម្លាំងចលករមួយចូលរួមលើកទឹកចិត្ត និងផ្ដល់កម្លាំងចិត្តដល់កីឡាករ-កីឡាការិនីដែលត្រូវចូលរួមប្រកួតតំណាងជាតិ ក្នុងព្រឹត្តិការណ៍អន្ដរជាតិនានាទៀតផង។
ដោយឡែកអតីតកីឡាការិនីរូបស្រស់ដែលទើបវិវត្តន៍ខ្លួនជាគ្រូបង្វឹក កញ្ញា ហែមថុន វិទិនី បានសម្ដែងការសប្បាយចិត្តដែលបានចូលរួមចែករំលែកបទពិសោធន៍ និងបង្ហាញនូវរបៀបហាត់ប្រាណងាយៗដល់ប្រជាពលរដ្ឋ សម្រាប់យកទៅអនុវត្តតាមផ្ទះរៀងៗខ្លួន។ ទន្ទឹមជាមួយគ្នា វិទិនី បានជំរុញ និងលើកទឹកចិត្តឲ្យប្រជាពលរដ្ឋគ្រប់រូបចូលរួមលេងកីឡា ហើយបានលើកទឹកចិត្តឲ្យកីឡាករ-កីឡាការិនីទាំងអស់ជម្នះនូវឧបសគ្គដ៏លំបាកនេះ ដោយការតាំងស្មារតី និងខិតខំប្រឹងប្រែងហ្វឹកហាត់ ដើម្បីត្រៀមចូលរួមការប្រកួតអន្ដរជាតិនានា ពិសេសដំណើរឆ្ពោះទៅស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជា។
គួរបញ្ជាក់ថា ទិវាអូឡាំពិកបានរៀបចំឡើងតាមប្រព័ន្ធ Online លើកដំបូងក្រោមប្រធានបទ “ហាត់ប្រាណនៅផ្ទះជាមួយអត្តពលិក” ដើម្បីជំរុញប្រជាពលរដ្ឋឲ្យចូលរួមលេងកីឡា ពិសេសក្នុងបរិបទកូវីដ-១៩ ដើម្បីទទួលបានសុខភាពល្អផង ពិសេសស្របពេលពាក្យស្លោក “ប្រជាជនម្នាក់លេងកីឡាមួយមុខ” ដែលជាយុទ្ធនាការឆ្ពោះទៅស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ផង។ កម្មវិធីនេះបានធ្វើឡើងកាលពីល្ងាចថ្ងៃពុធម្សិលមិញ ដោយមានកីឡាករ-កីឡាការិនីជម្រើសជាតិ និងមហាជនជាច្រើនចូលរួមតាមប្រព័ន្ធ Zoom ក្រោមវត្តមានភ្ញៀវកិត្តិយស ២រូបគឺកីឡាការិនី ស៊ន សៀវម៉ី និងកញ្ញា ថែមថុន វិទិនី៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
