ភ្នំពេញ៖ មន្ត្រីស្ថានឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ បានជួយសម្របសម្រួលនូវដំណើរទស្សនកិច្ចរបស់អ្នកវិនិយោគកូរ៉េ ដើម្បីជួបពិភាក្សាឲ្យបានស៊ីជម្រៅបន្ថែម ជាមួយថ្នាក់ដឹកនាំ ក៏ដូចជាមន្ត្រីតាមក្រសួងស្ថាប័នមួយចំនួន ក្នុងការស្វែងរកឱកាសវិនិយោគ នៅក្នុងប្រទេសកម្ពុជា ។ 

ដោយកិច្ចសម្របសម្រួលនេះ ធ្វើឡើងពីសំណាក់លោក ខាត់ ចិន អនុព័ន្ធពាណិជ្ជកម្មអមស្ថានទូត តំណាងលោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ចាប់ពីថ្ងៃទី៨ ដល់ទី១២ ខែមករា ឆ្នាំ២០២៤ ។ 

ដំណើរទស្សនកិច្ចនេះ គណៈប្រតិភូកូរ៉េ បានជួបពិភាក្សាការងារជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ឯកឧត្តម សុខ ខាវ៉ាន់ រដ្ឋលេខាធិការក្រសួងរ៉ែ និងថាមពល, ឯកឧត្តម អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ និងលោក គឹម សំបូរ អគ្គនាយកក្រុមហ៊ុនកាស៊ូប៊ី ឯ.ក ព្រមទាំងស្ថាប័នពាក់ព័ន្ធផ្សេងទៀត ។ 

ក្នុងជំនួបជាមួយឯកឧត្តម ហែម វណ្ណឌី និងគណៈប្រតិភូកូរ៉េបាន ដោយភាគីទាំងពីបាន សង្កត់លើការជំរុញពាណិជ្ជកម្មនាំចេញ-នាំចូល រវាងប្រទេសទាំងពីរ និងការបង្កើតកិច្ចសហប្រតិបតិ្តការលើវិស័យឧស្សាហកម្មកែច្នៃ ដូចជារថយន្ត គ្រឿងបន្លាស់ និងគ្រឿងចក្រផ្សេងៗ ។ 

ចំណែកជំនួបជាមួយ ឯកឧត្តម ប្រាក់ ដាវីដ ភាគីកូរ៉េមានគោលបំណង ចង់ស្វែងយល់បន្ថែមអំពីផលិតផលដូងប្រេង កៅស៊ូ និងផលិតផលកសិកម្ម ដែលមានសក្តានុពល ដែលអាចនាំចូលទៅកាន់ទីផ្សារកូរ៉េ ។ ដោយឡែកជំនួបជាមួយ រដ្ឋលេខាធិការក្រសួងរ៉ែ និងថាមពល បានពិភាក្សា និងសិក្សាស្វែងយល់ពីការផលិត និងលទ្ធភាពនៃការនាំចេញប្រេងកាត ពីកម្ពុជា ចូលទីផ្សារកូរ៉េ ហើយជំនួបជាមួយអគ្គនាយក នៃអគ្គនាយកដ្ឋានធនធានរ៉ែ បានពិភាក្សា និងសិក្សាបន្ថែមអំពីប្រភពរ៉ែនៅកម្ពុជា និងលទ្ធភាព នៃការផលិត និងនាំចូលទៅកាន់ទីផ្សារកូរ៉េ ។

ចំពោះជំនួបជាមួយអគ្គនាយកក្រុមហ៊ុនកាស៊ូប៊ី ឯ.ក និងគណៈប្រតិភូកូរ៉េ ដោយភាគីទាំងពីរ ចង់បង្កើតដៃគូរសហការ ពាណិជ្ជកម្ម លើវិស័យប្រេងសាំង ប្រេងម៉ាស៊ូត និងសូឡា ។ ជាលទ្ធផលពីជំនួបនេះ ភាគីទាំងពីរបានឯកភាពលើការពិនិត្យលទ្ធភាពបំពេញតម្រូវការ ឱ្យគ្នាទៅវិញទៅមកលើវិស័យប្រេង តាមរយៈការផ្តល់ឯកសារជាក់ស្តែងនាពេលខាងមុខ ។ 

គួរបញ្ជាក់ថា ក្នុងអំឡុងដំណើរទស្សនកិច្ចនេះ គណប្រតិភូកូរ៉េ បានសម្តែងនូវភាពពេញចិត្តយ៉ាងក្រៃលែង និងថ្លែងអំណរគុណដល់រដ្ឋាភិបាលកម្ពុជា ដែលបានអនុញ្ញាតឱ្យចូលជួបសម្តែងការគួសម ក៏ដូចជាសិក្សាឱ្យបានស៊ីជម្រៅបន្ថែម អំពីឱកាសនិងបរិយាកាស នៃការវិនិយោគនៅកម្ពុជា ។ បន្ថែមពីនេះ ភាគីកូរ៉ក៏បានសម្តែងការពេញចិត្តចំពោះស្ថានទូត ដែលតែងតែយកចិត្តទុកដាក់ លើសំណើររបស់វិនិយោគិន និងពាណិជ្ជករ ក្នុងការសម្របសម្រួល និងរៀបចំរាល់ដំណើរទស្សនកិច្ចទៅកម្ពុជា ដែលនេះបង្កើតជាផ្លែផ្កា សម្រាប់កិច្ចសហប្រតិបត្តិការបន្តនាពេលខាងមុខ ៕ អត្ថបទ បាន សុខរិទ្ធិ