ភ្នំពេញ ៖ ល្ងាចថ្ងៃទី១០ ខែមករានេះ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ បានទទួលជួបពិភាក្សាការងារជាមួយ លោក ម៉ាខាស ប៊ឺលី (Markus Buerli) នាយកសហប្រតិបត្តិការ នៃទីភ្នាក់ងារស្វីសសម្រាប់ការអភិវឌ្ឍ និងសហប្រតិបត្តិការ (SDC) ដើម្បីពិភាក្សាពង្រីកគម្រោងជំនួយបណ្តុះបណ្តាលជំនាញទេសចរណ៍ រួមចំណែកសម្រេចគោលដៅជាយុទ្ធសាស្ត្របណ្តុះបណ្តាលជំនាញវិជ្ជាជីវៈយុវជន១,៥ លាននាក់។

​នៅក្នុងជំនួបនេះ ឯកឧត្តមរដ្ឋមន្ត្រី សុខ សូកេន បានថ្លែងអរគុណទីភ្នាក់ងារ ស្វីស សម្រាប់ការអភិវឌ្ឍន៍ និងកិច្ចសហប្រតិបត្តិការ គាំទ្រដល់កម្មវិធីបណ្តុះបណ្តាលបដិសណ្ឋារកិច្ចកម្ពុជា (HoKa) ដល់យុវជនកី្រក្រងាយរងគ្រោះជាង ៤ពាន់នាក់ នៅតាមខេត្តគោលដៅគម្រោងចំនួន១០ខេត្ត និងគាំទ្រចំពោះ ការពង្រីកបណ្តុះបណ្តាលបដិសណ្ឋារកិច្ចកម្ពុជា ដល់ខេត្តគោលដៅថ្មីចំនួន២ រួមមានខេត្តកោះកុង និងខេត្តកំពង់ឆ្នាំង ចាប់ពីឆ្នាំ២០២៤តទៅ។ 

 ឯកឧត្តមរដ្ឋមន្ត្រី ថ្លែងថា តាមរយ:ការអនុវត្តគម្រោងជំនួយរដ្ឋាភិបាលស្វីស នឹងរួមចំណែករប្រែក្លាយកម្ពុជាជាគោលដៅទេសចរណ៍ប្រកបដោយភាពរស់រវើក ការប្រកួតប្រជែង ចីរភាព និងបរិយាបន្ន។

លោក ម៉ាខាស ប៊ឺលី បង្ហាញការតាំងចិត្តថា ទីភ្នាក់ងារស្វីសសម្រាប់ការអភិវឌ្ឍន៍នៅកម្ពុជា នឹងពង្រីកជំនួយកិច្ចសហប្រតិបត្តិការវិស័យទេសចរណ៍បន្ថែមទៀត ជាពិសេស លើការបណ្តុះបណ្តាលជំនាញវិជ្ជាជីវៈទេសចរណ៍ និងការគ្រប់គ្រងគោលដៅទេសចរណ៍ឲ្យមានភាពទាក់ទាញប្រកបដោយភាពប្រកួតប្រជែងខ្ពស់។

លោក ម៉ាខាស ប៊ឺលី ថ្លែងថា កន្លងមករដ្ឋាភិបាលស្វីសបានផ្តល់ជំនួយអនុវត្តគម្រោងអភិវឌ្ឍន៍ជំនាញ (SDP) អនុវត្តដោយអង្គការស្វីស ខន់ថាក់ និងពង្រីកអនុវត្តគម្រោងបង្កើតឱកាសការងារសមរម្យដល់យុវជន (DEY) អនុវត្តដោយអង្គការអន្តរជាតិខាងការងារ (ILO) សំដៅចូលរួមលើកម្ពស់ជំនាញវិជ្ជាជីវៈទេសចរណ៍នៅកម្ពុជា ការពង្រឹងគុណភាពសេវាកម្មទេសចរណ៍ស្របតាមស្តង់ដាជាតិនិងអាស៊ាន ។

ក្នុងជំនួបឯកឧត្តមរដ្ឋមន្ត្រី និងទីភ្នាក់ងារស្វីស ក៏បានពិភាក្សាគ្នាបន្ថែមជំរុញអភិវឌ្ឍធនធានមនុស្ស បន្តអនុវត្តកម្មវិធីអភិវឌ្ឍន៍ជំនាញដំណាក់កាលទី២ ឆ្នាំ២០២៤-២០២៨ រៀបចំយន្តការបណ្តុះបណ្តាលវិជ្ជាជីវៈទេសចរណ៍ស្របតាមគុណវុឌ្ឍិជាតិកម្ពុជា រៀបចំប្រព័ន្ធធ្វើតេស្ត សមត្ថភាព អ្នកជំនាញតាមអនឡាញ និងគាំទ្រការកម្មវិធីគ្រប់គ្រងគោលដៅទេសចរណ៍ សម្រាប់រមណីយដ្ឋានទេសចរណ៍សំខាន់ៗនៅកម្ពុជាផងដែរ។  អត្ថបទ ៖ ស៊ុម សុខជា