ភ្នំពេញ ៖ សិក្ខាកាមបរទេសចំនួន១៣នាក់ មកពីប្រទេសបីផ្សេងគ្នា បានឆ្លងកាត់ការបង្វឹកដោយជោគជ័យពីគ្រូឯកទេសកម្ពុជាលើជំនាញបច្ចេកទេសបោសសម្អាតមីននិងសុនខហិតមីនជំនាន់ទី២ ក្នុងរយៈពេល៣សប្តាហ៍ គិតចាប់ពីថ្ងៃទី១១ ដល់ថ្ងៃទី២៩ ខែធ្នូ ឆ្នាំ២០២៣កន្លងមកនេះនៅវិទ្យាស្ថានបច្ចេកទេសសកម្មភាពកំចាត់មីនខេត្តកំពង់ឆ្នាំង។

​យោងតាមផេកហ្វេសបុករបស់មជ្ឈមណ្ឌលសកម្មភាពកំចាត់មីនកម្ពុជាបានចុះផ្សាយថា នាព្រឹកថ្ងៃទី១១ ខែមករា ឆ្នាំ២០២៤ សិក្ខាកាមបរទេសនៃអង្គការ អាប៉ូប៉ូ ចំនួន ១៣ នាក់មកពីប្រទេសបីផ្សេងគ្នា ដែលរួមមានសិក្ខាកាមសញ្ជាតិ អ៊ុយក្រែន ចំនួន១០នាក់ សិក្ខាកាមសញ្ជាតិកូឡុំប៊ីចំនួន ២នាក់ និងសិក្ខាកាមសញ្ជាតិហ្ស៊កដានីចំនួន១នាក់ នេះ ត្រូវបានឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានធ្វើពិធីប្រគល់ជូននូវវិញ្ញាបនបត្រ័បញ្ជាក់ពីភាពជោគជ័យលើវគ្គហ្វឹកហ្វឺនបំប៉នមូលដ្ឋានគ្រឹះបច្ចេកទេសបោសសម្អាតមីនជំនាន់ទី២ រយៈពេល ៣សប្តាហ៍ គិតចាប់ពីថ្ងៃទី១១ ដល់ថ្ងៃទី២៩ ខែធ្នូ ឆ្នាំ២០២៣កន្លងមកនៅក្នុងវិទ្យាស្ថានបច្ចេកទេសសកម្មភាពកំចាត់មីននៃខេត្តកំពង់ឆ្នាំង។

 ប្រភពខាងលើបានបញ្ជាក់ថា វគ្គហ្វឹកហ្វឺនលើកទី២នេះ មានគោលបំណងពង្រឹងសមត្ថភាព ដល់សិក្ខាកាមទៅលើការដាក់ស្លាកចម្ការមីន/គ្រាប់ និងការប្រើប្រាស់ម៉ាស៊ីនរាវមីន ដើម្បីឲ្យសិក្ខាកាមទាំងនោះអាចមានសមត្ថភាពគ្រប់ គ្រាន់ក្នុងការប្រើប្រាស់នៅក្នុងសកម្មភាពបោសសម្អាតមីន នៅក្នុងប្រទេសរៀងៗខ្លួនវិញ ។ ដែលកាលពីវគ្គហ្វឹកហ្វឺនដូចគ្នានេះ ជំនាន់ទី១ មានសិក្ខាកាមចូលរួមសរុប៩ នាក់ មកពី ប្រទេសប៊ូសនៀ ប្រទេសអង់ហ្គោឡា ប្រទេសទួរគី និង ប្រទេសហ្ស៊កដានី។

   សូមជម្រាបថា អង្គភាពស៊ីម៉ាក់បានផ្តល់ការហ្វឹកហ្វឺនដល់មន្រ្តី សិក្ខាកាមអន្តរជាតិលើវិស័យសកម្មភាពមីននេះអស់រយៈជាង១ទស្សវត្សរ៍កន្លងមកហើយ ពោលគឺចាប់ តាំងពីឆ្នាំ២០១០មកម្លេះ ក្នុងនោះអង្គភាពស៊ីម៉ាក់បានផ្តល់ការហ្វឹកហ្វឺនដល់សិក្ខាកាមអន្តរជាតិ ចំនួនប្រមាណជាង ៧០០នាក់ មកពីប្រទេសកូឡុំប៊ី អង់ហ្គោឡា អ៊ឺរ៉ាក់ ឡាវ ភូមា នេប៉ាល់ និងប្រទេសអ៊ុយក្រែន ជាដើម៕ អត្ថបទ ៖ ភារម្យ