បាល់ទាត់៖ ក្រុមការពារតំណែងជើងឯកបឹងកេត បានចាប់ផ្ដើមសកម្មភាពប្រមូលផ្ដុំហ្វឹកហាត់ឡើងវិញហើយ បន្ទាប់ពីបញ្ចប់ការធ្វើចត្ដាឡីស័កដោយជោគជ័យកាលពីថ្មីៗ ដើម្បីត្រៀមស្វាគមន៍ការត្រឡប់មកវិញនៃលីគកំពូលកម្ពុជា បន្ទាប់ពីក្រុមនាគខៀវនេះបានខកខានទាំងស្រុង ក្នុងការប្រកួតពានរង្វាន់លក្ខណៈមិត្តភាព និងដកស្រង់បទពិសោធន៍ League Cup 2021។
សូមបញ្ជាក់ថា ក្រុមបឹងកេតបានខកខានក្នុងការប្រកួតពានរង្វាន់ League Cup 2021 ក៏ដូចជាសកម្មភាពប្រមូលផ្ដុំហ្វឹកហាត់ជាដើម បន្ទាប់ពីរកឃើញករណីវិជ្ជមានលើមន្ដ្រីរបស់ខ្លួនម្នាក់កាលពីថ្ងៃទី៤ ខែមិថុនា ពោលគឺមុនចាប់ផ្ដើមយុទ្ធនាការប្រកួតពានរង្វាន់ League Cup ១ថ្ងៃ។ បន្ទាប់មកគណៈកម្មការប្រកួតបាល់ទាត់ជាតិកម្ពុជា ក៏សម្រេចដកសិទ្ធក្រុមបឹងកេតពីការប្រកួតនេះ ដោយតម្រូវឲ្យពួកគេធ្វើចត្ដាឡីស័ករយៈពេល ១៤ថ្ងៃដើម្បីទប់ស្កាត់ការរីករាលដាលនៃជំងឺកូវីដ-១៩ រហូតដល់ថ្ងៃទី១៨ ខែមិថុនា ទើបបឹងកេតបានបញ្ចប់ចត្ដាឡីស័កដោយជោគជ័យ ដោយគ្រប់បុគ្គលិក និងកីឡាករទាំងអស់បានធ្វើតេស្ដអវិជ្ជមានចំនួន ៣លើក ខណៈមន្ដ្រីរបស់ខ្លួនម្នាក់ដែលរកឃើញវិជ្ជមានជំងឺដ៏កាចសាហាវនេះ ក៏បានជាសះស្បើយនៅថ្ងៃនោះដែរ។
ដូច្នេះការចាប់ផ្ដើមប្រមូលផ្ដុំហ្វឹកហាត់ឡើងវិញ របស់ក្រុមជើងឯកលីគកំពូលកម្ពុជា ៤សម័យនេះ ពួកគេបានផ្ដោតសំខាន់លើការត្រៀម ការប្រកួតត្រឡប់មកវិញនៃលីគកំពូលកម្ពុជាឆ្នាំ២០២១ នាដើមខែកក្កដាខាងមុខ តែបើគ្មានការប្រែប្រួលទេនោះ បឹងកេតនឹងត្រូវរង់ចាំការប្រកួតបន្ទាប់របស់ខ្លួនរហូតដល់ចុងខែកក្កដា បន្ទាប់ពីកម្មវិធីប្រកួតវគ្គចែកពូលនៃពានរង្វាន់ AFC Cup 2021 ដែលគ្រោងប្រកួតចុងខែនេះកំពុងស្ថិតក្នុងភាពស្រពេចស្រពិល ហើយអាចនឹងមានការពន្យារពេលជាថ្មីនៅឡើយ។ គួរបញ្ជាក់ថា ក្នុងការប្រកួតក្របខណ្ឌលីគកំពូលកម្ពុជារដូវកាលឆ្នាំ២០២១ ក្រុមនាគខៀវបឹងកេតទើបរកបាន ៣ពិន្ទុក្នុងដៃប៉ុណ្ណោះ បន្ទាប់ពីឆ្លងកាត់ ៤ប្រកួតឈ្នះ ១ និងចាញ់ ៣ រួមមានចាញ់ណាហ្គាវើលដ៏ ១-០, ចាញ់ក្រុមភ្នំពេញក្រោន ២-១, ចាញ់ក្រុមអង្គរថាយហ្គឺរ ១-០ និងប្រកួតចុងក្រោយរបស់ខ្លួនបានយកឈ្នះក្រុមបាតតារាងសូលទីឡូអង្គរក្នុងលទ្ធផល ៣-០៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
