អាជ្ញាធរ បាននិយាយថា ទឹកទន្លេកុងហ្គោ បានឡើងដល់កម្រិតខ្ពស់បំផុត ក្នុងរយៈពេលជាង ៦០ឆ្នាំ ដែលបណ្តាលឲ្យមានទឹកជំនន់នៅទូទាំងសាធារណរដ្ឋប្រជាធិបតេយ្យកុងហ្គោ (DRC) និងសាធារណរដ្ឋកុងហ្គោ និង បានសម្លាប់មនុស្សជាង ៣០០នាក់ ក្នុងរយៈពេលប៉ុន្មានខែកន្លងទៅនេះ។

ការធ្វើផែនការទីក្រុងមិនល្អ និងហេដ្ឋារចនាសម្ព័ន្ធខ្សោយ បានធ្វើឲ្យប្រទេសអាហ្វ្រិកមួយចំនួន ងាយរងគ្រោះដោយសារទឹកជំនន់ភ្លាមៗ បន្ទាប់ពីមានភ្លៀងធ្លាក់ខ្លាំង ដែលកាន់តែញឹកញាប់ ដោយសារតែការប្រែប្រួលអាកាសធាតុ។

អាជ្ញាធរ បានប្រាប់សារព័ត៌មានរ៉យទ័រថា កាលពីថ្ងៃពុធ (ទី១០ ខែមករា) ទឹកទន្លេ បានឡើងដល់កម្ពស់ ៦,២០ម៉ែត្រពីលើនីវ៉ូទឹកសមុទ្រ គ្រាន់តែទាបជាងកំណត់ត្រាឆ្នាំ ១៩៦១ ដែលមានកម្ពស់ ៦,២៦ម៉ែត្រ ដោយបន្ថែមថា ទឹកជំនន់បានកើតឡើង បន្ទាប់ពីមានភ្លៀងធ្លាក់ខ្លាំងជាពិសេសនៅក្នុងប្រទេសនេះ។

សង្កាត់ជាច្រើននៅក្នុងទីក្រុង Kinshasa ដែលមានប្រជាជនរស់នៅច្រើនរបស់ DRC បានជន់លិច រួមជាមួយនឹងខេត្តជាច្រើនផ្សេងទៀត។ មនុស្សជិត ៣០០ នាក់ បានស្លាប់ និង ៣០០.០០០ គ្រួសារ បានរងផលប៉ះពាល់ ដោយផ្ទះរាប់ម៉ឺនខ្នង ត្រូវបានបំផ្លាញ។