មន្ត្រីបាននិយាយកាលពីថ្ងៃពុធថា សមាជិកអង្គការណាតូ ទួរគី ប៊ុលហ្គារី និងរូម៉ានី នឹងចុះហត្ថលេខានៅសប្តាហ៍នេះ នូវកិច្ចព្រមព្រៀងបឋមស្តីពីការដោះមីននៅសមុទ្រខ្មៅ។

កងទ័ពជើងទឹករុស្ស៊ី បានដាក់មីននៅឆ្នេរសមុទ្រខ្មៅរបស់អ៊ុយក្រែន ក្នុងដំណាក់កាលដំបូងនៃការលុកលុយរបស់ខ្លួន កាលពីឆ្នាំមុន។

ចាប់តាំងពីពេលនោះមក គ្រាប់មីនមួយចំនួន បានធ្លាក់ចូលនៅក្នុងដែនទឹកសមុទ្រខ្មៅនៃប្រទេសសមាជិកណាតូទាំងបី ដែលបង្កគ្រោះថ្នាក់ដល់ការដឹកជញ្ជូន និងធ្វើឲ្យមានភាពស្មុគស្មាញដល់កិច្ចខិតខំប្រឹងប្រែងរបស់អ៊ុយក្រែន ក្នុងការទម្លាយការបិទផ្លូវរបស់កងទ័ពជើងទឹករុស្ស៊ី។

មន្ត្រីការពារជាតិជាន់ខ្ពស់មកពីប្រទេសទួរគី ប៊ុលហ្គារី និងរូម៉ានី នឹងចុះហត្ថលេខាលើអនុស្សរណៈយោគយល់គ្នានៅទីក្រុងអ៊ីស្តង់ប៊ុល នៅថ្ងៃព្រហស្បតិ៍នេះ ដើម្បីបង្កើតក្រុមនាវាចរណ៍ប្រឆាំងមីន ក្នុងសមុទ្រខ្មៅ (MCM Black Sea) ដែលនឹងត្រួតពិនិត្យប្រតិបត្តិការបេសកកម្មដោះមីន។

ក្រសួងការពារជាតិប៊ុលហ្គារី បាននិយាយថា៖«សកម្មភាពរបស់ក្រុម MCM Black Sea គឺដើម្បីសន្តិភាពទាំងស្រុង ហើយមិនត្រូវបានដឹកនាំប្រឆាំងនឹងប្រទេសណាមួយឡើយ»។

ក្រុមនេះ ត្រូវបានគេរំពឹងថា នឹងជួយកែលម្អអន្តរកម្ម និងទំនាក់ទំនងអ្នកជិតខាងល្អរវាងអ្នកចូលរួម ដោយមិនជំនួសវត្តមានរបស់អង្គការណាតូ និងការរារាំងជាបន្តបន្ទាប់ និងសកម្មភាពការពារ នៅក្នុងតំបន់សមុទ្រខ្មៅ។

ក្រសួងការពារជាតិរ៉ូម៉ានី បាននិយាយថា គំនិតផ្តួចផ្តើមនេះ នឹងមានរចនាសម្ព័ន្ធបញ្ជាប្តូរវេន និង រួមចំណែកដល់ការពង្រឹងជំហរសម្ព័ន្ធមិត្តនៃការរារាំង និងការការពារផ្នែកខាងកើត។