ភ្នំពេញ ៖ មន្ទីរសុខាភិបាលរាជធានីភ្នំពេញ ទទួលសម្ភារបរិក្ខារពេទ្យរបស់សមាគមនិកាយសាសនាចក្រ នៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សរុបចំនួន ១៤គម្រោង គិតជាថវិកាចំនួន ១.៧៨៥.២៨៦,២៧ ដុល្លាអាមេរិក (មួយលានប្រាំពីររយប៉ែតសិបប្រាំពាន់ ពីររយប៉ែតសិបប្រាំមួយ ដុល្លាអាមេរិក និងម្ភៃប្រាំពីរសេន), នារសៀលថ្ងៃទី១១ ខែមករា ឆ្នាំ២០២៤នេះ នៅមនី្ទរពេទ្យបង្អែកកម្ពុជា-ចិន សែនសុខ ។

​ឯកឧត្តមបណ្ឌិត ងី មានហេង ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ បានមានប្រសាសន៍ថា ចាប់ពីឆ្នាំ២០២២ រហូតមកដល់បច្ចុប្បន្ន សមាគមនិកាយសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយបាននឹងកំពុងអនុវត្តគម្រោងជួសជុលកែលំអ អគារមន្ទីរពេទ្យ ផ្តល់ជំនួយឧកបរណ៍ វេជ្ជសាស្ត្រ និងសម្ភារបរិក្ខាពេទ្យផ្សេងៗដល់មន្ទីរពេទ្យបង្អែកទាំង៨ និងមណ្ឌលសុខភាពចំនួន០១មណ្ឌល ចំណុះមន្ទីរសុខាភិបាល នៃរដ្ឋបាលរាជធានីភ្នំពេញ សរុបចំនួន ១៤គម្រោង គិតជាថវិកាចំនួន ១.៧៨៥.២៨៦,២៧ ដុល្លាអាមេរិក (មួយលានប្រាំពីររយប៉ែតសិបប្រាំពាន់ ពីររយប៉ែតសិបប្រាំមួយ ដុល្លាអាមេរិក និងម្ភៃប្រាំពីរសេន)។ គម្រោងមនុស្សធម៌ដ៏ថ្លៃថ្លានេះ បាននឹងកំពុងចូលរួមលើកកម្ពស់ការផ្តល់សេវាសុខាភិបាល និងសុខុមាលភាពជូនប្រជាពលរដ្ឋក្នុងមូលដ្ឋានរាជធានីភ្នំពេញបានកាន់តែប្រសើរឡើង និងជាផ្នែកមួយក្នុងការចូលរួមពង្រឹងគុណភាពសេវាសុខាភិបាលតាមមន្ទីរពេទ្យបង្អែកទាំង៨ ជាមួយរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយ គតិបណ្ឌិតខ្ពង់ខ្ពស់បំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ការកែលម្អហេដ្ឋារចនាសម្ព័ន្ធរូបវ័ន្ត និងការផ្តល់នូវសម្ភារឧបករណ៍បរិក្ខាបន្ថែមស្របតាមតម្រូវការចាំបាច់ ត្រូវបានអនុវត្តជាបន្តបន្ទាប់នៅតាមមន្ទីរពេទ្យបង្អែក និងមណ្ឌលសុខភាព។ ប្រភពថវិកាសម្រាប់កែលម្អនេះបានមកពី ថវិការបស់រាជរដ្ឋាភិបាល និងដៃគូអភិវឌ្ឍ ព្រមទាំងអង្គការមនុស្សធម៌។

ជាមួយគ្នានោះដែរលោក Brent Muhlestein អ្នកឯកទេសផ្នែកគម្រោងមនុស្សធម៌ និងលោក រ័ត្ន ច័ន្ទសុភា នាយកសមាគមនិកាយសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រចាំព្រះរាជាណាចក្រកម្ពុជា បានលើកឡើងរួមគ្នាថា សមាគម មានគោលបំណងចង់ឲ្យមនី្ទរពេទ្យបង្អែក និងមណ្ឌលសុខភាពទាំងអស់ ក្នុងមូលដ្ឋានរាជធានីភ្នំពេញ ទទួលបានការអភិវឌ្ឍ និងផ្តល់ការព្យាបាលជំងឺឆ្លងផ្សេងៗ ជូនដល់ប្រជាពលរដ្ឋ ឲ្យកាន់តែមានប្រសិទ្ធភាព។

នាឱកាសនោះឯកឧត្តម អ៊ីមរ៉ន ហាស្សាន់ អភិបាលរងរាជធានីភ្នំពេញ បានថ្លែងអំណរគុណយ៉ាងជ្រាលជ្រៅចំពោះសមាគម ដែលបានបរិច្ចាគថវិកា ក្នុងការជួសជុលកែលម្អអគារតាមមនី្ទរពេទ្យបង្អែកទាំង៨ និងមណ្ឌលសុខភាពចំនួន១ ព្រមទាំងបំពាក់សម្ភារៈបរិក្ខាវេជ្ជសាស្រ្តទំនើបៗ និងជួយបន្តបណ្តុះបណ្តាលធនធានមនុស្ស។ ឯកឧត្តម ក៏សូមផ្តល់អនុសាសន៍ណែនាំជូនដល់ថ្នាក់ដឹកនាំ មន្រី្ត និងបុគ្គលិកសុខាភិបាលនូវកិច្ចការចាំបាច់ និងមានសារសំខាន់មួយចំនួនដូចខាងក្រោម៖ ថ្នាក់ដឹកនាំមន្ទីរពេទ្យក៏ដូចជាបុគ្គលិកទាំងអស់ត្រូវចេះថែទាំជាប្រចាំនូវសម្ភារៈបរិក្ខាក៏ដូចជា៖ អគារ និងហេដ្ឋារចនាសម្ពន័នានានៅក្នុងមន្ទីរពេទ្យ ដើម្បីធានាការប្រើប្រាស់បានយូរអង្វែង និងខិតខំបម្រើសេវាប្រកបដោយការទទួលខុសត្រូវខ្ពស់ និងគោរពក្រមសីលធម៌វិជ្ជាជីវៈអោយបានខ្ជាប់ខ្ជួនជានិច្ច មានសាមគ្គីភាពផ្ទៃក្នុង និងចេះជួយគ្នាទៅវិញទៅមកក្នុងការបំពេញភារៈកិច្ច និងខិតខំសិក្សាស្វែងយល់នូវបច្ចេកវិជ្ជាថ្មីៗជាបន្តបន្ទាប់ដើម្បីបង្កើនចំណេះដឹងឱ្យទាន់ទៅនឹងភាពរីកចម្រើន ផ្នែកវិទ្យាសាស្ត្រ ជាពិសេសការប្រើប្រាស់ប្រព័ន្ធ Digital និងត្រូវគោរពតួនាទី ភារកិច្ច និងម៉ោងពេលបំពេញកាងារអោយបានត្រឹមត្រូវនិងពេញលេញ៕  អត្ថបទ រដ្ឋា