កាលពីពុធម្សិលមិញ អង្គការសុខភាពពិភពលោក(WHO) បានលុបបោលបេសកកម្មផ្តល់ជំនួយវេជ្ជសាស្រ្តតាមការគ្រោងទុកមួយទៀត ទៅកាន់តំបន់ហ្គាហ្សា ដោយសារក្តីកង្វល់សន្តិសុខ ដែលជាការលុបចោលលើកទី ៦នៅក្នុងរយៈពេល ២សប្តាហ៍កន្លងមកនេះ ។

អគ្គលេខាធិការ WHOលោក Tedros Adhanom Ghebreyesus បាននិយាយថា វាគឺជាបេសកកម្មជាលើកទី ៦ទៅកាន់តំបន់ភាគខាងជើងហ្គាហ្សា ដែលត្រូវបានលុបចោលដោយទីភ្នាក់ងារអង្គការសហប្រជាជាតិ(UN)មួយនេះ ដោយសារតែសំណើរទៅកាន់ទីនោះ ពុំត្រូវបានយល់ព្រម ឬធានាចំពោះសន្តិសុខ ចាប់តាំងពីបេសកកម្មលើកចុងក្រោយរបស់ពួកយើង កាលពីថ្ងៃទី ២៦ ខែធ្នូ ឆ្នាំ ២០២៣ ។

ការវាយប្រហាររបស់អ៊ីស្រាអែលនៅតំបន់ហ្គាហ្សាដែលបានធ្វើឡើងក្រោយការវាយឆ្មក់សម្លាប់មនុស្សដោយក្រុមជីវពលហាម៉ាស់នៅតំបន់ភាគខាងត្បូងអ៊ីស្រាអែលកាលពីថ្ងៃទី ៧ ខែតុលានោះ បានធ្វើឲ្យមនុស្សភាគច្រើននៃពលរដ្ឋ ២,៣លាននាក់នៅតំបន់បិទច្រកមួយនេះ ចាកចេញពីផ្ទះសម្បែងរបស់ពួកគេ ហើយនិងបានធ្វើឲ្យហេដ្ឋារចនាសម្ព័ន្ធក្លាយជាអគារបាក់បែក និងបណ្តាលឲ្យខ្វះខាតធ្ងន់ធ្ងរស្បៀងអាហារ ទឹក និងឱសថ ។ 

លោក Mike Ryan គឺជាប្រធានផ្នែកសង្រ្គោះបន្ទាន់របស់ WHO និយាយថា វានឹងក្លាយជាការងារធំ ក្នុងការស្តាប្រព័ន្ធសុខភាពសាធារណៈនៅតំបន់ហ្គាហ្សា បើទោះបីជាមានបទឈប់បាញ់ក៏ដោយ ។

ដោយឡែក លោក Richard Peeperkorn គឺជាអ្នកតំណាងរបស់ WHOនៅតំបន់ហ្គាហ្សា និយាយថា លោកសង្ឃឹមជឿជាក់ថា បេសកកម្មគ្រោងទុករបស់ WHOសម្រាប់ថ្ងៃព្រហស្បតិ៍ទៅកាន់តំបន់ភាគខាងជើងហ្គាហ្សា នឹងបន្តតាមផែនការ ប៉ុន្តែបេសកកម្មគ្រោងទុកចំនួន ១៦លើក ឬ ១៧លើកក្នុងចំណោមបេសកកម្មគ្រោងទុក ២១លើករបស់ទីភ្នាក់ងារ UNមួយនេះ ត្រូវបានលុបចោលរួចទៅហើយ មកទល់នឹងពេលនេះ ៕