ពោធិ៍សាត់៖ ផ្លូវក្រាលគ្រួសក្រហម១ខ្សែ ដែលមានសភាពចាស់ទ្រុឌទ្រោម ខូចខាតយ៉ាងដំណំ ក្នុងស្រុកតាលោសែនត្រូវបានមន្ទីរអភិវឌ្ឍន៍ជនបទខេត្តពោធិ៍សាត់ ធ្វើការជួសជុលកែលម្អអោយប្រសើរឡើងវីញជាបន្ទាន ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ។

បើតាមតំណាងក្រុមប្រឹក្សាឃុំតាលោ បានអោយដឹងថាផ្លូវនេះ មានប្រវែង៣០០០ម៉ែត្រ ភ្ជាប់ភូមិចំនួន៣ មកកាន់ទីប្រជុំជនស្រុកតាលោសែនជ័យ គឺភូមិតាលោ -ភូមិបុស្សគោ និងភូមិព្រែកន្ទួត ក្នុងឃុំតាលោ  ហើយផ្លូវនេះក៏ភ្ជាប់ទៅកាន់ភូមិជង្រុក ឃុំផ្ទះរ៉ុងផងដែរ ។ ផ្លូវនេះជាផ្លូវមានសារៈសំខាន់បំផុតសម្រាប់ប្រជាពលរដ្ឋក្នុងការធ្វើដំណើរទៅសាលារៀន ទៅមណ្ឌលសុខភាពនិងដឹកកសិផលជាដើម នៅមុនពេលជួសជុលផ្លូវនេះមានភាពពិបាកខ្លាំងក្នុងការចរាចរណ៍។

ដោយពិនិត្យឃើញស្ថានភាពជាក់ស្តែង ក្រសួងអភិវឌ្ឍន៍ជនបទ និងមន្ទីរអភិវឌ្ឍន៍ជនបទខេត្តពោធិ៍សាត់ បានធ្វើការជួសជុលជាបន្ទាន់ដើម្បីសម្រួលការលំបាករបស់ប្រជាពលរដ្ឋ ធ្វើអោយប្រជាពលរដ្ឋមានសេចក្តីរីករាយ តែទោះជាយ៉ាងណាលោកសង្ឃឹមថាបងប្អូនប្រជាពលរដ្ឋ នឹងចូលរួមថែរក្សា ហើយរូបលោកក៏ដូចជាប្រជាពលរដ្ឋក្នុងមូលដ្ឋាន សង្ឃឹមថា ទៅថ្ងៃអនាគតរាជរដ្ឋាភិបាលនឹងអភិវឌ្ឍន៍ប្រែក្លាយផ្លូវនេះទៅជាផ្លូវកៅស៊ូរ ។

បន្ទាប់ពីធ្វើការជួសជុលរួចរាល់ នៅថ្ងៃទី១១ ខែមករា ឆ្នាំ២០២៤នេះ លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្តពោធិ៍សាត់ រួមនិងលោក និន ស៊ីណាត អនុប្រធានមន្ទីររួមនិងមន្ត្រីជំនាញ និងដោយមានការចួលរួមពីក្រុមប្រឹក្សាឃុំតាលោ និងប្រជាពលរដ្ឋ បានធ្វើការចុះពិនិត្យ និងធ្វើការប្រគល់ទទួល ផ្លូវ១ខ្សែនេះសម្រាប់ប្រើប្រាស់៕ អត្ថបទ ​ ៖ ភិរុណ ពៅ