កិច្ចព្រមព្រៀងមួយ ត្រូវបានចុះហត្ថលេខាដោយប្រទេសរូម៉ានី ប៊ុលហ្គារី និងទួរគី នៅថ្ងៃព្រហស្បតិ៍ (ទី១១ ខែមករា) នេះ ជុំវិញផែនការរួមគ្នា ដើម្បីបោសសម្អាតគ្រាប់មីនអណ្តែតក្នុងសមុទ្រខ្មៅដែលមានដោយសារសង្គ្រាមនៅអ៊ុយក្រែន បន្ទាប់ពីកិច្ចចរចាជាច្រើនខែ រវាងសម្ព័ន្ធមិត្តរបស់អង្គការណាតូ (NATO)។

រដ្ឋមន្ត្រីការពារជាតិទួរគី លោក Yasar Guler សមភាគីរ៉ូម៉ានី លោក Angel Tilvar និងអនុរដ្ឋមន្ត្រីការពារជាតិប៊ុលហ្គារី លោក Atanas Zapryanov បានចុះហត្ថលេខាលើអនុស្សរណៈយោគយល់គ្នា នៅទីក្រុងអ៊ីស្តង់ប៊ុល ដើម្បីបង្កើតគំនិតផ្តួចផ្តើមត្រីភាគី ដើម្បីបោសសម្អាតគ្រឿងផ្ទុះនេះ។

លោក Guler បាននិយាយនៅក្នុងពិធីចុះហត្ថលេខានេះថា៖ «ជាមួយនឹងការចាប់ផ្តើមនៃសង្រ្គាម ការគំរាមកំហែងពីមីនអណ្តែតនៅក្នុងសមុទ្រខ្មៅ បានកើតមានឡើង។ ដើម្បីកម្ចាត់គ្រាប់មីនទាំងនោះ យើងបានយល់ព្រមបង្កើតក្រុមការងារប្រឆាំងមីន នៅសមុទ្រខ្មៅ»។

គ្រាប់មីនក្នុងសមុទ្របានបង្កការគំរាមកំហែងដល់ផ្លូវនាំចេញរបស់អ៊ុយក្រែនតាមរយៈសមុទ្រខ្មៅ ចាប់តាំងពីការលោកលុយរបស់រុស្ស៊ី កាលពីខែកុម្ភៈ ឆ្នាំ២០២២ ហើយនាវាពាណិជ្ជកម្មជាច្រើនត្រូវបានវាយប្រហារ ក្នុងនោះរួមទាំងនាវាផ្ទុកទំនិញដ៏ធំដែលធ្វើដំណើរទៅកាន់កំពង់ផែ River Danube ដើម្បីទៅដាក់គ្រាប់ធញ្ញជាតិកាលពីខែធ្នូផងដែរ៕