អាជ្ញាធរគមនាគមន៍របស់ប្រទេសអ៊ីតាលី AGCOM បានអនុម័តច្បាប់ថ្មីដ៏តឹងរ៉ឹង ដើម្បីលើកកម្ពស់តម្លាភាពលើការបង្ហោះតាមបណ្ដាញសង្គមដែលធ្វើឡើងដោយតារាល្បីៗដែលមានទស្សនិកជនតាមប្រព័ន្ធអ៊ីនធឺណិតយ៉ាងច្រើន។

ការសម្រេចនេះកើតឡើងបន្ទាប់ពីអ្នកមានឥទ្ធិពលដ៏ល្បីល្បាញជាងគេមួយរូប គឺនាង Chiara Ferragni ដែលមានអ្នកតាមដានជិត ៣០លាននាក់នៅលើបណ្ដាញសង្គម Instagram ត្រូវបានពិន័យជាប្រាក់ជាង ១លានអឺរ៉ូ (១,១០លានដុល្លារ) ដោយទីភ្នាក់ងារប្រឆាំងនឹងការទុកចិត្តរបស់ប្រទេសអ៊ីតាលី ជុំវិញកង្វះខាតភាពច្បាស់លាស់ នៅក្នុងគំនិតផ្តួចផ្តើមសប្បុរសធម៌បុណ្យណូអែល។

AGCOM កាលពីល្ងាចថ្ងៃពុធ (ទី១០ ខែមករា) បានឲ្យដឹងនៅក្នុងសេចក្តីថ្លែងការណ៍មួយថា ច្បាប់នេះនឹងត្រូវបានអនុវត្តដំបូង ចំពោះបណ្ដាអ្នកមានឥទ្ធិពល ដែលបង្ហោះជាភាសាអ៊ីតាលី និងធ្វើការជាមួយម៉ាកយីហោអ៊ីតាលី ដែលមានអ្នកតាមដានច្រើនជាង ១លាននាក់។

រាល់មាតិកាផ្សាយពាណិជ្ជកម្ម ដែលត្រូវបានបង្ហោះ នឹងត្រូវដាក់ស្លាកយ៉ាងច្បាស់លាស់ ដើម្បីឲ្យអាចស្គាល់បាន បើមិនដូច្នេះទេ តារាល្បីៗនៃបណ្ដាញសង្គមទាំងនោះ ត្រូវប្រឈមនឹងការផាកពិន័យរហូតដល់ ៦០០.០០០អឺរ៉ូ។ ដោយសារវិសាលភាពនៃការទទួលបានការគាំទ្ររបស់ពួកគេ អ្នកមានឥទ្ធិពលលើប្រព័ន្ធអ៊ីនធឺណិតជារឿយៗ អាចប្រើឥទ្ធិពលច្រើនជាងការផ្សាយពាណិជ្ជកម្មបែបប្រពៃណី ដើម្បីជំរុញដល់ការលក់ផលិតផល និងបង្កើនការបង្ហាញម៉ាកយីហោ។

ជាមួយគ្នានេះ អាជ្ញាធរអ៊ីតាលីបានបន្ថែមថា បណ្ដាអ្នកមានឥទ្ធិពលនឹងត្រូវតម្រូវឲ្យគោរពក្រមសីលធម៌ ដែលបានអនុវត្តចំពោះប្រព័ន្ធផ្សព្វផ្សាយទាំងអស់ ដែលតម្រូវឲ្យមានការប្រាស្រ័យទាក់ទងដោយមិនលម្អៀង ចៀសវាងព័ត៌មានក្លែងក្លាយ និងការបង្ហោះដែលរើសអើង ឬប្រកាន់ពូជសាសន៍៕