ភ្នំពេញ÷ លោក ជីង ឆោមមុនី សាកលវិទ្យាធិការរង នៃសាកលវិទ្យាល័យភូមិន្ទវិចិត្រសិល្បៈ ទទួលបន្ទុកមហាវិទ្យាល័យសិល្បៈសូនរូប បានអញ្ជើញប្រគល់ប័ណ្ណសរសើរ និងរង្វាន់លើកទឹកចិត្ត ជូនដល់និសិ្សតឆ្នើម ចំនួន១២រូប ដែលបានបញ្ចប់ការសិក្សាក្នុងឆ្នាំសិក្សា២០២២-២០២៣, នាព្រឹកថ្ងៃទី១១ ខែមករា ឆ្នាំ២០២៤។

លោកសាស្រ្តាចារ្យ សុផុន សំខាន់ ព្រឹទ្ធបុរសមហាវិទ្យាល័យសិល្បៈសូនរូប បានមានប្រសាសន៍ថា ថ្ងៃនេះមហាវិទ្យាល័យសិល្បៈសូនរូប បានរៀបចំការប្រគល់ប័ណ្ណសរសើរជូនដល់និសិ្សតឆ្នើមចំនួន១២រូប ក្នុងចំណោមនិសិ្សត១៤៧នាក់ ស្រី៩៦នាក់ សិក្សាលើជំនាញឯកទេសចំនួន៤ រួមមាន៖ ឯកទេសតុបតែងលម្អ នៃស្ថាបត្យកម្ម, ឯកទេសគំនូរសារគមនាគមន៍, ឯកទេសវិចិត្រកម្ម និងឯកទេសចម្លាក់ ដែលបានបញ្ចប់បរិញ្ញាបត្រសិល្បៈសូនរូប ឆ្នាំសិក្សា២០២២-២០២៣ នាសម័យប្រឡងកាលពីថ្ងៃទី២៣ រហូតដល់ថ្ងៃទី២៦ ខែតុលា ឆ្នាំ២០២៣កន្លងទៅនេះ។ ក្នុងនោះឯកទេស តុបតែងលម្អ នៃស្ថាបត្យកម្ម មានចំនួន១០១នាក់ នារី៧៦នាក់ លទ្ធផលទទួលបាន និទ្ទេសល្អប្រសើរ ចំនួន៦១នាក់ និងនិទ្ទេសល្អណាស់ ចំនួន៤០នាក់។ -ឯកទេស គំនូរសារគមនាគមន៍ មានចំនួន៣៧នាក់ នារី១៧នាក់ លទ្ធផលទទួលបាន និទ្ទេសល្អប្រសើរ ចំនួន៩នាក់, និទ្ទេសល្អណាស់ ចំនួន៦នាក់ និងនិទ្ទេសល្អ ចំនួន១២នាក់។ -ឯកទេស វិចិត្រកម្ម ចំនួន៧នាក់ នារី៣នាក់ លទ្ធផលទទួលបាន និទ្ទេសល្អប្រសើរ ចំនួន៤នាក់ និងនិទ្ទេសល្អ ចំនួន៣នាក់ និងឯកទេស ចម្លាក់ ចំនួន២នាក់ លទ្ធផលទទួលបាន និទ្ទេសល្អប្រសើរ ចំនួន២នាក់។

ចំណែកនិសិ្សតឆ្នើម ចំនួន៤រូប ក្នុងចំណោមនិសិ្សត១២រូប សិក្សាលើជំនាញឯកទេសទាំង៤(ជាអតីតនិសិ្សត) ពិតជាសប្បាយរីករាយមែនទែន មានឱកាសមកទទួលបណ្ណសរសើរពីមហាវិទ្យាល័យសិល្បៈសូនរូប នៃសាកលវិទ្យាល័យភូមិន្ទវិចិត្រសិល្បៈ បន្ទាប់ពីទទួលការបណ្តុះបណ្តាលពីលោកសាស្រ្តាចារ្យ លោកគ្រូ អ្នកគ្រូ បានធ្វើឲ្យនិសិ្សតគ្រប់រូប មានចំណេះ ជំនាញ និងអភិវឌ្ឍសមត្ថភាព ព្រមទាំងបានស្វែងរកការងារធ្វើ និងអ្វីដែលថ្មីៗ តាមរយៈបទពិសោធន៍ដែលនិសិ្សតបានឆ្លងកាត់ក្នុងរយៈពេល៤ឆ្នាំកន្លងមកនេះ ហើយក៏ជាពេលដែលពួកគាត់ត្រូវទទួលបានផ្លែផ្កា និងអាចចូលរួមជួយដល់សង្គមជាតិ បន្ទាប់ពីសិក្សានៅក្នុងមហាវិទ្យាល័យសិល្បៈសូនរូបនេះ។

នាឱកាសនោះលោក ជីង ឆោមមុនី សាកលវិទ្យាធិការរង នៃសាកលវិទ្យាល័យភូមិន្ទវិចិត្រសិល្បៈ បានរំលឹកឡើងវិញថា សាកលវិទ្យាល័យភូមិន្ទវិចិត្រសិល្បៈ បានបើកឡើងវិញនៅក្នុងឆ្នាំ១៩៨៨ ហើយដំណើរការតែម្តង នៅឆ្នាំ១៩៨៩-១៩៩០ បើគិតមកដល់ពេលនេះ មានរយៈពេលជាង៣០ឆ្នាំមកហើយ។ ទន្ទឹមនឹងនោះនិសិ្សតមានការកើនឡើងច្រើន បើនិយាយពីការបើកដំបូង និសិ្សតចូលសិក្សា មានចំនួនមិនដល់១០០នាក់ទេ។ តទៅទៀតសាកលវិទ្យាល័យ និងពង្រីកបន្ថែមទៀត ដែលបច្ចុប្បន្នយើងបានពង្រីកអគារថ្មីមួយបន្ថែមទៀត គឺសាកលវិទ្យាល័យភូមិន្ទវិចិត្រសិល្បៈ ទីតាំងទី២ ស្ថិតនៅក្នុងសង្កាត់ព្រែកលៀប ខណ្ឌជ្រោយចង្វារ និងចាប់ផ្តើមដំណើរការថ្នាក់ឆ្នាំមូលដ្ឋាន។

ជាចុងក្រោយលោក ជីង ឆោមមុនី ក៏សុំឲ្យប្អូនៗនិស្សិតដែលបានបញ្ចប់បរិញ្ញាបត្រសូនរូបនេះ មានគំនិត មានប្រាជ្ញា មានស្មារតីបង្កើតនូវស្នាដៃសិល្បៈថ្មីៗ ដើម្បីពង្រឹងនូវស្មារតីវប្បធម៌ជាតិយើង ឲ្យរីកចម្រើន ឲ្យខ្លាំងណាពេលអនាគតឲ្យសមស្រប ដែលព្រះរាជាណាចក្រកម្ពុជា ប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣៥ និងជាប្រទេសអភិវឌ្ឍន៍មានចំណូលខ្ពស់ នៅឆ្នាំ២០៥០ និងជាគុណប្រយោជន៍ដល់ប្អូនៗនិសិ្សតមានមោទនភាពក្នុងសង្គមខ្មែរយើង៕

អត្ថបទ រដ្ឋា