មេដឹកនាំប្រទេស ប៉ាពួ ញូហ្គីណេ(Papua New Guinea) បាន​ប្រកាស​ដាក់​រដ្ឋ​ក្នុង​គ្រា​អាសន្ន​រយៈពេល ១៤ ថ្ងៃនៅក្នុងរដ្ឋធានី ព័រ ម៉រ៉េស្បី(Port Moresby) បន្ទាប់ពីមនុស្ស១៥ នាក់បាន​ស្លាប់​នៅ​ក្នុងកុបកម្ម ខណៈមនុស្សយ៉ាងច្រើនបានសម្រុកចូលលួចយកទំនិញ និងដុតហាង។

លោក​នាយករដ្ឋមន្ត្រី ជែមស៍ ម៉ារ៉េប (James Marape) កាលពី​ថ្ងៃ​ព្រហស្បតិ៍​បាន​ប្រកាស​ថា​ ទាហានជាង ១.០០០នាក់ ត្រូវបានត្រៀមដើម្បីបញ្ជូនទៅទីតាំងដែលចាំបាច់ ក្រោមក្រិត្យគ្រា​អាសន្ន។

លោក Marape បាននិយាយនៅក្នុងសន្និសីទសារព័ត៌មានថា លោកបានព្យួរតំណែង​ស្នងការ​នគរបាល​របស់​ប្រទេស​នេះ ក៏ដូចជាមន្ត្រីការិយាធិបតេយ្យជាន់ខ្ពស់នៅក្នុងនាយកដ្ឋានហិរញ្ញវត្ថុ និង​រតនាគារ ខណៈរដ្ឋាភិបាល ត្រួតពិនិត្យទៅលើមូលហេតុនៃភាពចលាចលនេះ។ 

អំពើ​ហិង្សាបានផ្ទុះឡើងនៅក្នុងទីក្រុង ព័រ ម៉រ៉េស្បី (Port Moresby) កាលពីល្ងាចថ្ងៃពុធ បន្ទាប់​ពី​ក្រុម​ទាហាន នគរបាល និងឆ្មាំពន្ធ​នាគារ​បាន​ចេញ​តវ៉ា​ជុំវិញ​ការ​កាត់​ប្រាក់​ដែល​មិន​អាច​ពន្យល់​បាន​ចំពោះ​ប្រាក់ឈ្នួលរបស់ពួកគេដែល​ក្រុម​អ្នក​តវ៉ា​បាន​និយាយថា​ រដ្ឋាភិបាល​បាន​កាត់​ប្រាក់​ខែ​ពួក​គេ​ដល់ទៅ៥០%។ ក្នុងរយៈ​ពេលប៉ុន្មានម៉ោង ភាពចលាចលបាន​រីករាល​ដាល​ដល់​ទីក្រុងឡេ (Lae) ចម្ងាយប្រហែល ៣០០ គីឡូម៉ែត្រ ទៅភាគខាងជើងរដ្ឋធានី។

នគរបាល​​បាននិយាយថាមនុស្ស៨ នាក់បានស្លាប់នៅរដ្ឋធានី ព័រ ម៉រ៉េស្បី (Port Moresby) ខណៈ មនុស្ស ៧ នាក់បានស្លាប់នៅក្នុងទីក្រុង ឡេ (Lae)៕