ភ្នំពេញ៖ តាមរយៈសេចក្តីជូនដំណឹងរបស់ក្រសួងធនធានទឹក និងឧតុនិយម ចេញផ្សាយ​នៅថ្ងៃទី១២ ខែមករា ឆ្នាំ២០២៤នេះ បានឲ្យដឹងថា​ បន្ទាប់ពីបានធ្វើការតាមដាន និងព្យាករណ៍​ស្ថានភាពអាកាសធាតុរួចមក ក្រសួងធនធានទឹក និងឧតុនិយម សូមជម្រាប​ជូនដំណឹង​ដល់សាធារណៈជនឱ្យបានជ្រាបអំពីស្ថានភាពអាកាសធាតុបន្តនៅក្នុងរដូវប្រាំងដូចខាងក្រោម៖

១-សីតុណ្ហភាពនៅក្នុងរដូវប្រាំងមានការប្រែប្រួលខ្លាំង​ ជាមួយនឹងសីតុណ្ហភាពក្តៅកើនឡើង ខ្ពស់ជាងមធ្យមភាគច្រើនឆ្នាំ ​និងក្តៅជាងឆ្នាំ២០២៣ ​ដោយសីតុណ្ហភាពមធ្យមអតិបរមា ៣៧°C និងសីតុណ្ហភាពអតិបរមាខ្ពស់បំផុតរង្វង់ ៤១°C នៅក្នុងខែមេសា និងដើមខែឧសភា។

២-ភ្លៀងកក់ខែអាចមានតិចតួច ​ជាមួយគ្នា ​នឹងរបបខ្យល់មូសុងនិរតីខ្សោយធ្វើឱ្យរដូវវស្សាចាប់ផ្តើម​យឺត(យឺតជាងឆ្នាំ២០២៣) ​រីឯបាតុភូតផ្គររន្ទះ ​និងខ្យល់កន្ត្រាក់កើតច្រើននៅក្នុងខែមេសា ​និង ខែឧសភា​ ឆ្នាំ២០២៤។

យោងលើស្ថានភាពអាកាសធាតុបែបនេះ ក្រសួងធនធានទឹក និងឧតុនិយម សូមជូនដំណឹង​ដល់ក្រសួង ​ស្ថាប័នពាក់ព័ន្ធ ​អាជ្ញាធរដែនដី ​និងសាធារណៈជនចូលរួម​សហការថែរក្សា ប្រើប្រាស់​ទឹកដោយសន្សំសំចៃក្នុងកម្រិតខ្ពស់ ​ជាពិសេសបណ្តាតំបន់ជនបទដាច់ស្រយាល ដែលនៅឆ្ងាយ​ពីប្រភពទឹក។ ជាមួយគ្នានោះដែរ ​សូមយកចិត្តទុកដាក់ ដោយប្រុងប្រយ័ត្នចំពោះបាតុភូតផ្គររន្ទះ និងខ្យល់កន្ត្រាក់ដែលនឹងអាចកើតមានច្រើន៕