បាល់ទាត់៖ ទីបំផុត Cristiano Ronaldo បានតាមទាន់កំណត់ត្រារបស់ខ្សែប្រយុទ្ធអ៊ីរ៉ង់ Ali Daei ហើយដែលជាអ្នកស៊ុតបញ្ចូលទីច្រើនជាងគេឲ្យក្រុមជំរើសជាតិ បន្ទាប់ពីរកបាន ២គ្រាប់ក្នុងជំនួបស្មើគ្នា ២-២ ជាមួយនឹងបារាំងប្រកួតចុងក្រោយនៃពូល F។
បាល់ ១១ម៉ែត្រ ២គ្រាប់របស់ Cristiano Ronaldo ធ្វើឲ្យកីឡាករវ័យ ៣៥ឆ្នាំរូបនេះតាមទាន់កំណត់ត្រារបស់ Ali Daei ដែលមានសរុប ១០៩ស៊ុតបញ្ចូលទីឲ្យក្រុមជំរើសជាតិ។ Ali Daei សំរេចបានកំណត់ត្រា ១០៩គ្រាប់នេះជាមួយក្រុមអ៊ីតាលីត្រឹមរយៈពេល ១៣ឆ្នាំប៉ុណ្ណោះពោលគឺចន្លោះឆ្នាំ ១៩៩៣ ដល់ ២០០៦។ ដោយឡែកសំរាប់លទ្ធផលស្មើយប់មិញធ្វើអោយព័រទុយហ្កាល់ជាក្រុមលេខ៣ ក្នុងពូល F នេះតែជាក្រុមឈរលើគេក្នុងតារាងក្រុមលេខ៣ ល្អបំផុតដោយនឹងត្រូវឡើងជួបប៊ែលហ្ស៊ិកនៅវគ្គ ១៦ក្រុមចុងក្រោយ ស្របពេលបារាំងជាក្រុមលេខ១ ពូល F នេះឡើងជួបស្វ៊ីស។
ចំណែកអាល្លឺម៉ង់យប់មិញមិនអាចយកឈ្នះហុងគ្រីបានឡើយបានត្រឹមស្មើគ្នា ២-២ ផងដែរមានន័យថា ក្រុមរបស់លោក Joachim Low បានលេខ២ ក្នុងពូល F នេះឡើងជួបជាមួយអង់គ្លេសនៅវគ្គ ១៦ក្រុមចុងក្រោយ។ ងាកមកការប្រកួតពូល E ជុំចុងក្រោយដែរ ដោយពូលនេះក្រុមដែលឡើងវគ្គបន្តមាន ២ក្រុមប៉ុណ្ណោះគឺស៊ុតអែតក្រុមលេខ១ ក្នុងពូលក្រោយឈ្នះប៉ូឡូញប្រផិតប្រផើយ ៣-២ បន្តជួបជាមួយអ៊ុយក្រែននៅជុំបន្ត ខណៈអេស្ប៉ាញស្គាល់ឈ្នះលើកដំបូងក្រោយបំបាក់ស្លូវ៉ាគី ៥-០ ជាក្រុមលេខ២ ក្នុងពូលឡើងជួបក្រូអាស៊ី។ ដោយឡែកស្លូវ៉ាគីលេខ៣ ក្នុងពូលមាន ៣ពិន្ទុតែមិនអាចឡើងជុំបន្តឡើយដោយឈរក្រោមគេក្នុងចំណោមក្រុមលេខ៣ ល្អបំផុតប្រៀបនឹងពូលផ្សេង ខណៈប៉ូឡូញក្រោមគេមានតែ ១ពិន្ទុ។ វគ្គ ១៦ក្រុមចុងក្រោយនឹងចាប់ផ្តើមនៅថ្ងៃទី២៦ នេះគឺវែលជួបដាណឺម៉ាក និងអ៊ីតាលីជួបអូទ្រីស៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
