ភ្នំពេញ៖ ខណៈនៅថ្ងៃទី១៥ ខែមករា ឆ្នាំ២០២៤ខាងមុខនេះ នឹងចាប់ផ្តើមបើកវគ្គបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិកភ័យ ក្នុងជំហានដំបូងចំនួន ៥០០ថ្នាក់។ រហូតមកទល់ពេលនេះ សាលាបណ្តុះបណ្តាលជំនាញបចេ្ចកទេស និងវិជ្ជាជីវៈ ក្រោមក្រសួងការងារ និងបណ្តុះបណ្តាលវិជ្ជាជីវៈ បានត្រៀមខ្លួនរួចជាស្រេច សម្រាប់ការបណ្តុះបណ្តាលជំនាញជូនដល់យុវជនទាំងអស់នោះ។

​សូមបញ្ជាក់ថា វគ្គបណ្តុះបណ្តាលជំនាញក្នុងជំហានដំបូងនេះ ចាប់ផ្តើមក្រោយពីប្រមុខរាជរដ្ឋាភិបាលកម្ពុជា បានប្រកាសដាក់ឱ្យអនុវត្តជាផ្លូវការនូវកម្មវិធីបណ្ដុះបណ្ដាលជំនាញបច្ចេកទេស វិជ្ជាជីវៈសម្រាប់យុវជនមកពីគ្រួសារក្រីក្រនិងគ្រួសារងាយរងហានិភ័យចំនួន ១,៥លាននាក់ រួមទាំងកម្មករនិយោជិតផងដែរ កាលពីថ្ងៃទី១៤ ខែវិច្ឆិកា ឆ្នាំ២០២៣។ កម្មវិធីនេះ នឹងជួយដល់យុវជន ដែលមកពីគ្រួសារមានបណ្ណសមធម៌ និងបណ្ណសម្គាល់គ្រួសារងាយរងហានិភ័យ អាចចូលរៀនដោយមិនបង់ថ្លៃ ទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀល ទទួលបានការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ ចុះកម្មសិក្សានៅតាមសហគ្រាស គ្រឹះស្ថានឧស្សាហកម្ម និងក្រុមហ៊ុនឯកជន ព្រមទាំងទទួលបានជំនាញមួយពិតប្រាកដ ដែលទីផ្សារការងារកំពុងត្រូវការ និងឱកាសការងារធ្វើសមរម្យ និងប្រាក់ចំណូលទៀងទាត់ដែលអាចជួយគ្រួសាររួចចាកផុតពីភាពក្រីក្រ។

លោក ឡៅ តិចវេង គ្រូបង្រៀនជំនាញផ្នែកផលិតនំ នៅមហាវិទ្យាល័យទេសចរណ៍ និងបដិសណ្ឋារកិច្ច នៃវិទ្យាស្ថានពហុបច្ចេកទេសកម្ពុជា ហៅកាត់ (NPIC) ស្ថិតនៅតំបន់កប់ស្រូវ ខណ្ឌព្រែកព្នៅ រាជធានីភ្នំពេញ ក្នុងបទសម្ភាសន៍ជាមួយ ប៊ីធីវី នៅព្រឹកថ្ងៃទី១២ ខែមករានេះ បានបញ្ជាក់ថា សម្រាប់ការបណ្តុះបណ្តាលដែលគ្រោងនឹងប្រកាសបើកជាផ្លូវការនាពេលខាងមុខនេះ លោកបានត្រៀមរួចរាល់ហើយនូវមេរៀនទាំងឡាយដែលពាក់ព័ន្ធ សម្រាប់បង្រៀនទៅកាន់សិស្ស។ លោកបានអះអាងទៀតថា នឹងខិតខំឲ្យអស់ពីកម្លាំងកាយចិត្ត ក្នុងការបណ្តុះបណ្តាលដល់យុវជនទាំងអស់ ឲ្យមានចំណេះ ជំនាញពិតប្រាកដ ដើម្បីអាចទទួលបានការងារ និងមុខរបរសមរម្យ។

លោក ស៊ន ពិសិដ្ឋ គ្រូបង្រៀនជំនាញផ្នែកមេកានិក និងលោក ភាន់ ផាក់ គ្រូជំនាញផ្នែកដំឡើងបណ្តាញអគ្គិសនីក្នុងអគារ នៃវិទ្យាស្ថានពហុបច្ចេកទេសកម្ពុជាដូចគ្នានេះ លើកឡើងស្រដៀងគ្នាថា ក៏បានត្រៀមខ្លួនរួចជាស្រេចក្នុងការបណ្តុះបណ្តាលជំនាញដល់យុវជនមកពីគ្រួសារក្រីក្រ និងគ្រួសារងាយរងហានិភ័យនាពេលខាងមុខនេះ។ 

ក្រុមលោកគ្រូទាំងអស់ខាងលើនេះ ក៏បានអំពាវនាវទៅដល់យុវជនដែលមិនទាន់ចុះឈ្មោះចូលរៀន សូមស្វែងយល់អំពីជំនាញវិជ្ជាជីវៈ និងបច្ចេកទេស ហើយនាំគ្នាមកចុះឈ្មោះចូលរៀនឲ្យបានគ្រប់ៗគ្នា ដើម្បីមានជំនាញមួយពិតប្រាកដ និងមានការងារ និងចំណូលសម្រាប់ទ្រទ្រង់ជីវភាពគ្រួសារ និងសេដ្ឋកិច្ចជាតិ។

តាមអនុសាសន៍របស់ប្រមុខរាជរដ្ឋាភិបាល ដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានចង្អុលបង្ហាញឲ្យក្រសួងការងារ និងបណ្តុះបណ្តាលវិជ្ជាជីវៈ ត្រូវអនុវត្តឱ្យបានក្នុងកម្មវិធីបណ្តុះបណ្តាលជំនាញវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិកភ័យ ចំនួន ១,៥លាននាក់ ត្រូវធ្វើយ៉ាងម៉េចឱ្យយុវជនបានចូលរៀន ពោលគឺ «រៀនឱ្យចប់ ឱ្យចេះ ឱ្យមានការងារ»៕

អត្ថបទ ៖ ឈិត បូរ៉ាវី