អ៊ុយក្រែន ៖ នាយកដ្ឋានកិច្ចការបរទេសរបស់ប្រទេសស្វីសបាននិយាយថា អ៊ុយក្រែន និងស្វីសនឹងធ្វើជាម្ចាស់ផ្ទះជំនួបទីប្រឹក្សាសន្តិសុខជាតិប្រហែល ១២០ប្រទេស នៅថ្ងៃអាទិត្យ (ទី១៤ ខែមករា) នាទីក្រុង Davos ដែលជាទីក្រុងរមណីយដ្ឋានរបស់ស្វីស ដោយនេះជាការជួបជុំចុងក្រោយបង្អស់ក្នុងកិច្ចប្រជុំជាបន្តបន្ទាប់ ដើម្បីប្រមូលការគាំទ្រ ចំពោះផែនការសន្តិភាពរបស់អ៊ុយក្រែន។

កិច្ចប្រជុំដែលកើតមានឡើងរហូតដល់ព្រឹត្តិការណ៍វេទិកាសេដ្ឋកិច្ចពិភពលោក ដែលត្រូវចាប់ផ្តើមនៅថ្ងៃបន្ទាប់ គឺជាការជួបជុំពិភាក្សាដ៏បំផុតលើកទី៤ នៃកិច្ចប្រជុំបែបនេះ បន្ទាប់ពីនៅមុននេះរៀបចំឡើងនៅទីក្រុង Copenhagen (កូប៉ិនហាក) របស់ដាណឺម៉ាក ទីក្រុង Jeddah (ជេដា) របស់អារ៉ាប៊ីសាអ៊ូឌីត និងថ្មីៗបំផុតចុងក្រោយ នៅប្រទេសម៉ាល់ត៍ក្នុងខែតុលា។ ក្រុមមន្ត្រីបានសង្ឃឹមថា កិច្ចប្រជុំនៅប្រទេសម៉ាល់ត៍ នឹងនាំទៅដល់ការកំណត់កាលបរិច្ឆេទ សម្រាប់កិច្ចប្រជុំកំពូលសន្តិភាពសកលមួយ ដើម្បីបង្កើតការរួបរួមគ្នាគាំទ្រដល់ផែនការសន្តិភាព ១០ចំណុចរបស់អ៊ុយក្រែន ដែលព្រាងឡើងដោយប្រធានាធិបតីលោក Volodymyr Zelenskiy ក្នុងខែធ្នូ ឆ្នាំ២០២២។

កាលពីខែវិច្ឆិកា មន្ត្រីជាន់ខ្ពស់នៃទីក្រុងគីវ បានប្រាប់សារព័ត៌មាន Reuters ថា កិច្ចប្រជុំកំពូលដើម្បីចាប់ផ្ដើមអនុវត្តផែនការ «អាច»នឹងប្រព្រឹត្តទៅនៅខែកុម្ភៈ ឆ្នាំ២០២៤ ដោយអ៊ុយក្រែនខ្លាចថា សង្រ្គាមនៅតំបន់ហ្កាហ្សាកំពុងធ្វើឲ្យពិបាកក្នុងការយកឈ្នះលើការគាំទ្រផ្នែកការទូត ចំពោះប្លង់មេ សម្រាប់រូបមន្តសន្តិភាពនេះ។ ផែនការរបស់លោក Zelenskiy រួមមានការអំពាវនាវឲ្យមានការស្ដារឡើងវិញនូវបូរណភាពដែនដីរបស់អ៊ុយក្រែន ការដកកងទ័ពរុស្ស៊ី ការការពារការផ្គត់ផ្គង់អាហារ និងថាមពល សុវត្ថិភាពនុយក្លេអ៊ែរ ហើយនិងការដោះលែងអ្នកទោសទាំងអស់។

កិច្ចពិភាក្សារូបមន្តសន្តិភាពមិនពាក់ព័ន្ធនឹងរុស្ស៊ី ដែលបានចាប់ផ្តើមការលុកលុយពេញលេញរបស់ខ្លួនលើអ៊ុយក្រែនក្នុងខែកុម្ភៈ ឆ្នាំ២០២២ ហើយបានគ្រប់គ្រងជិត ១ភាគ៥នៃដែនដីរបស់ប្រទេសនេះ។ រុស្ស៊ីបានច្រានចោល «រូបមន្តសន្តិភាព» នេះ ដោយនិយាយថា វានឹងមិនអាចអនុវត្តបាននោះទេ៕