អាមេរិក ៖ សហរដ្ឋអាមេរិក និងជប៉ុនបានបញ្ចប់ប្រតិបត្តិការរុករក ជួយសង្គ្រោះ និងប្រមូលបំណែក សម្រាប់យន្តហោះយោធា Osprey ១គ្រឿង និងទាហានអាកាសចំនួន ៨នាក់ដែលបានស្លាប់ នៅពេលដែលយន្តហោះនោះ បានធ្លាក់នៅម្ដុំកោះរបស់ប្រទេសជប៉ុន ដែលហេតុការណ៍នេះជំរុញឲ្យមន្ទីរបញ្ចកោណបញ្ឈប់ការហោះហើរនៃក្រុមយន្តហោះកន្ទុំរុយ (យន្តហោះអាចហោះឡើង ឬចុះចតដូចឧទ្ធម្ភាគចក្រ) របស់ខ្លួន។

នៅក្នុងសេចក្តីថ្លែងការណ៍ នាថ្ងៃសុក្រ (ទី១២ ខែមករា) នេះ បញ្ជាការប្រតិបត្តិការពិសេសរបស់កងទ័ពអាកាសអាមេរិក បានឲ្យដឹងថា ការស្វែងរកដែលមានរយៈពេលជាង ៤០ថ្ងៃ សម្រាប់យន្តហោះ ដែលបានធ្លាក់នៅកោះ Yakushima ភាគនិរតីរបស់ប្រទេសជប៉ុន កាលពីថ្ងៃទី២៩ ខែវិច្ឆិកា ឆ្នាំ២០២៣ មានពាក់ព័ន្ធនឹងបុគ្គលិកជាង ១.០០០នាក់ យន្តហោះ ៤៦គ្រឿង និងប្រព័ន្ធក្រោមទឹកគ្មានមនុស្សបញ្ជា។

សាកសពរបស់អាកាសយានិក ៧នាក់ ក្នុងចំណោមអាកាសយានិកទាំង ៨នាក់ នៅលើកោះនោះ ត្រូវបានរកឃើញរួមជាមួយនឹងបំណែកយន្តហោះភាគច្រើន។ ឧត្តមនាវីទោលោក Jeromy Williams មេបញ្ជាការនៃបញ្ជាការប្រតិបត្តិការពិសេសប៉ាស៊ីហ្វិក បាននិយាយនៅក្នុងសេចក្តីថ្លែងការណ៍ថា៖ «គំនិតរបស់យើងនៅតែដក់ចាប់ជាមួយក្រុមគ្រួសារ និងមិត្តរួមក្រុមនៃក្រុមអាកាសយានិកយន្តហោះ CV-22 របស់យើង ហើយយើងសូមថ្លែងអំណរគុណយ៉ាងស្មោះអស់ពីចិត្ត ចំពោះគ្រប់កម្លាំងជំនាញទាំងអស់ ដែលបានជួយក្នុងដំណើរការរុករកនេះ»។

ការស៊ើបអង្កេតលើឧបទ្ទវហេតុនេះកំពុងតែដំណើរការនៅឡើយ ប៉ុន្តែក្រសួងការពារជាតិអាមេរិក បានសម្រេចបញ្ឈប់ការហោះហើរយន្តហោះរបស់ខ្លួនរាប់រយគ្រឿង ក្នុងខែធ្នូ ឆ្នាំ២០២៣ ដើម្បីពិនិត្យមើលបញ្ហាឧបករណ៍ដែលអាចកើតមានសម្រាប់យន្តហោះ ដែលបានជាប់ពាក់ព័ន្ធក្នុងការធ្លាក់បណ្ដាលឲ្យមនុស្សស្លាប់ច្រើននេះ៕