អាមេរិក ៖ ក្រុមហ៊ុន Royal Caribbean កំពុងរៀបចំដាក់ឲ្យដំណើរការនូវនាវាទេសចរណ៍ចុងក្រោយ និងធំបំផុតរបស់ខ្លួន ឈ្មោះ Icon of the Seas (និមិត្តរូបរបស់សមុទ្រ) ដែលមានសមត្ថភាពផ្ទុកអ្នកដំណើរអតិបរមាប្រហែល ១០.០០០នាក់ ដោយធ្វើឲ្យវាក្លាយជានាវាទេសចរណ៍ធំបំផុតរបស់ពិភពលោក។

នាវានេះត្រូវបានរចនាឡើងដោយមានតំបន់ ឬសង្កាត់ដាច់ដោយឡែកពីគ្នាយ៉ាងពិសេសចំនួន៨ ដែលផ្តល់ឲ្យអ្នកដំណើរនូវបទពិសោធន៍ប្លែកៗយ៉ាងច្រើន ហើយសង្កាត់នីមួយៗ មានបរិវេណប្លែកៗពិសេសផ្ទាល់របស់សង្កាត់នោះ។ បរិវេណមួយ ក្នុងចំណោមនោះ ជាតំបន់បៃតងដែលមានឈ្មោះថា Central Park មានពោរពេញទៅដោយដើមរុក្ខជាតិជាច្រើន និងភោជនីយដ្ឋានផ្សេងៗ ដែលបង្កើតឡើងសម្រាប់ការកម្សាន្តរបស់អ្នកដំណើរ។ គំនិតនេះត្រូវបានរចនាឡើងដើម្បីសាងនូវអារម្មណ៍នៅខាងក្រៅ ខណៈពេលដែលនាវានៅលើសមុទ្រ។

លក្ខណៈពិសេសដ៏អស្ចារ្យនៃនាវា Icon of the Seas គឺសួនទឹកប្រកបដោយភាពច្នៃប្រឌិត ដែលធ្វើឲ្យវាគឺជានាវាដែលមានសួនទឹកផ្ទាល់ខ្លួននៅសមុទ្រ។ ការបន្ថែមនេះមានគោលបំណងផ្តល់ឲ្យអ្នកដំណើរនូវភាពសប្បាយរីករាយដ៏រំភើប និងសម្បូរបែប ក្នុងអំឡុងពេលជិះនាវានេះ។

ជាមួយនឹងការផ្តល់ជូននូវអាហារចម្រុះ នាវានេះមានភោជនីយដ្ឋាន និងបារជាង ៤០ផ្សេងៗគ្នា ដែលបម្រើជូននូវរសជាតិ និងចំណូលចិត្តជាច្រើនយ៉ាង។ នាវា Icon of the Seas គ្រោងនឹងចាប់ផ្តើមដំណើរទេសចរណ៍ដំបូងរបស់ខ្លួន នៅថ្ងៃទី២៧ ខែមករា ដោយចេញពីក្រុងម៉ៃអាមី សហរដ្ឋអាមេរិកឆ្ពោះទៅកាន់សមុទ្រការ៉ាប៊ីនភាគខាងកើត៕