កំពត ៖ នៅថ្ងៃទី១២ ខែមករា ឆ្នាំ២០២៤នេះ លោកជំទាវ ឌី សុខីទីឃាយុកោ ភរិយាឯកឧត្តម ហ៊ុន ម៉ានិត កូនប្រសារទី៣ របស់សម្តេចតេជោ ហ៊ុន សែន និងសម្តេចកិត្តិព្រឹទ្ធ ប្រធានមូលនិធិអណ្តូងទឹកស្អាត អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក រួមទាំងក្រុមការងារបានអញ្ជើញប្រគល់អណ្ដូងទឹកស្អាតចំនួន១០ ជូនប្រជាពលរដ្ឋនៅ ឃុំចំប៉ី ស្រុកអង្គជ័យ ខេត្តកំពត ប្រើប្រាស់ជាផ្លូវការ។

មានប្រសាសន៍សំណេះសំណាលជាមួយប្រជាពលរដ្ឋ ដែលបានអាស្រ័យផលអណ្តូងទឹកនាឱកាសនោះ លោកជំទាវប្រធានមូលនិធិ បាននាំនូវការផ្ដាំផ្ញើសួរសុខទុក្ខ ពីសំណាក់សម្ដេចតេជោ ហ៊ុន សែន អតីតនាយករដ្ឋមន្រ្តី និងសម្ដេចកិត្តព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ជូនចំពោះបងប្អូនប្រជាពលរដ្ឋដែលបានចូលរួម ដោយលោកតែងតែគិតគូរពីទុក្ខលំបាករបស់ប្រជាពលដ្ឋទូទៅនៅគ្រប់ទីកន្លែង។ ពិសេសការផ្តល់អណ្តូងទឹកស្អាតនាពេលនេះ គឺជាការរួមចំណែកលើកកម្ពស់សុខមាលភាព និងជីវភាពរស់របស់ប្រជាពលរដ្ឋ នៅតាមទីជនបទ អោយមានជីវភាពល្អប្រសើរ និងមានសុខភាពល្អ។

លោកជំទាវប្រធានមូលនិធិបានឱ្យដឹងទៀតថា អណ្តូងទឹកទាំងនេះគឺ ជាអំណោយរបស់អ្នកឧកញ៉ាមហាភក្តីសប្បុរិសភោគាធិបតី ហ៊ុន នាង និងមហាឧបាសិកា ឌី ប៉ុក ឪពុកម្តាយបង្កើតសម្តេចតេជោ ហ៊ុន សែន និងអ្នកឧកញ៉ាព្រឹទ្ឋមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី និងឧបាសក លីន គ្រី ឪពុកម្តាយបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សរុបទាំងអស់១០អណ្តូង ហើយថវិកាដែលយកមកធ្វើអណ្តូងទាំងនេះ គឺបានមកពីបច្ច័យបុណ្យសពបន្ទាប់ពីលោក ទទួល អនិច្ចកម្មទៅ រួមទាំងទ្រព្យសម្បត្តិដែលនៅសេសសល់ទាំងប៉ុន្មាន គឺយកមកធ្វើជាអណ្តូងទឹកជូនប្រជាពលរដ្ឋ ដែលខ្វះខាត ទឹកស្អាតប្រើប្រាស់ នៅគ្រប់រាជធានីខេត្តទាំងអស់ ដែលរហូតមកដល់ពេលនេះ បានជាង១៥០០អណ្តូងហើយ។ លោកជំទាវឱ្យដឹងថា មូលនិធិអណ្តូងទឹកស្អាត បានបង្កើតឡើងជាង១០ឆ្នាំមកហើយ ក្រោមការដឹកនាំដោយលោកជំទាវ បណ្ឌិត ពេជ ចន្ទមុន្នី ហ៊ុនម៉ាណែត តែបច្ចុប្បន្នលោកជំទាវបណ្ឌិត មានភារកិច្ចច្រើនដែលត្រូវបំពេញ ទើបផ្ទេរការងារនេះ មកលោកជំទាវដែលជាកូនប្រសារទី៣របស់សម្តេចតេជោនិងសម្តេចកិត្តិព្រឹទ្ឋ ជាអ្នកដឹកនាំបន្តជូនប្រជាពលរដ្ឋអាស្រ័យផល។ ដូច្នេះសូមឱ្យលោកយាយ លោកតា បងប្អូន ដែលអាស្រ័យផលនៃអណ្តូងទឹកទាំងអស់ រួមគ្នាថែរក្សាអណ្តូងទឹកទាំងនេះ អោយបានល្អ ជាប់គង់វង្សយូអង្វែង ដើម្បីជាប្រយោជន៍រួមនៅក្នុងសហគម។

ប្រជាពលរដ្ឋដែលទទួលផលពីអណ្តូងទឹកស្អាតទាំងអស់ សូមថ្លែងអំណរគុណយ៉ាងជ្រាលជ្រៅជាទីបំផុត ចំពោះម្ចាស់អំណោយខាងលើ ជាពិសេសសម្តេចតេជោ ហ៊ុន សែន អតីតនាយករដ្ឋមន្រ្តី សម្តេចកិត្តិព្រឹទ្ធបណ្ឌិត សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវបណ្ឌិត ដែលលោកតែងតែគិតគូរ ដល់ជីវភាពរស់នៅរបស់ប្រជាពលរដ្ឋគ្រប់ទិសទី ដែលត្រូវការចាំបាច់នូវទឹកស្អាតប្រើប្រាស់ ព្រោះពេលរដូវប្រាំងចូលមកដល់ ពួកគាត់មានការខ្វះខាតយ៉ាងខ្លាំង ត្រូវទិញទឹក រឺទៅរកទឹកនៅកន្លែងឆ្ងាយៗ។

​សូមបញ្ជាក់ថាក្នុងឱកាសនោះដែរ លោកជំទាវប្រធានមូលនិធិ និងក្រុមការងារ ក៏បាននាំយកអំណោយទ្រនប់ដៃរបស់សម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់លោកយាយ លោកតា និងកាបូបស្ពាយទៅដល់កុមារតូចៗ ដែលបានចូលរួមអបអរសាទរ ក្នុងពិធីប្រគល់អណ្តូងទឹកនេះដែរ៕ អត្ថបទៈ សំ ងីម