ទិន្នន័យគយចិនបង្ហាងនៅថ្ងៃសុក្រនេះថា ពាណិជ្ជកម្ម ២ផ្លូវសម្រាប់ឆ្នាំ ២០២៣របស់ចិនជាមួយរុស្ស៊ី បានកើនឡើងខ្ពស់បំផុតរហូតដល់ ២៤០ពាន់លានដុល្លារ ជាហេតុបង្កើតកំណត់ត្រាមួយផ្សេងទៀត ស្របពេលដែលប្រទេសទាំង ២ជំរុញឲ្យមានទំនាក់ទំនងសេដ្ឋកិច្ចកាន់តែជិតស្និតជាងមុន បើទោះបីជាសង្រ្គាមអ៊ុយក្រែននៅបន្តក៏ដោយ ។

ចិនដែលជាប្រទេសមួយក្នុងចំណោមប្រទេសប្រើប្រាស់ប្រេងច្រើនជាងគេបំផុតនៅលើពិភពលោក បានប្រែក្លាយជាប្រទេសសេដ្ឋកិច្ចដ៏សំខាន់សម្រាប់ប្រទេសនាំចេញថាមពលរុស្ស៊ី ដែលបច្ចុប្បន្នស្ថិតក្រោមទណ្ឌកម្មសេដ្ឋកិច្ចរបស់លោកខាងលិច ។

ខណៈពេលនោះដែរ ទីក្រុងម៉ូស្គូ បានបង្កើនផងដែរការទិញទំនិញចិន ចាប់ពីរថយន្តរហូតដល់ស្មាតហ្វូន ស្របពេលដែលក្រុមហ៊ុនអឺរ៉ុប និងសហរដ្ឋអាមេរិក បានចាកចេញពីទីផ្សារុស្ស៊ី ។

ពាណិជ្ជកម្មចិន-រុស្ស៊ី បានកើនឡើងដល់ ២៤០,១ពាន់លានដុល្លារក្នុងឆ្នាំ ២០២៣ ពោលគឺកើនឡើង ២៦,៣ភាគរយ ពីរយៈពេល ១ឆ្នាំមុន ។ នេះបើយោងតាមទិន្នន័យពីអគ្គរដ្ឋបាលគយចិន ។

ទិន្នន័យគយ បង្ហាញថា ការដឹកជញ្ជូនរបស់ចិនទៅកាន់រុស្ស៊ី បានកើនឡើង ៤៦,៩ភាគរយ ក្នុងឆ្នាំ ២០២៣ ពីរយៈពេល ១ឆ្នាំមុន ហើយនិងកើនឡើង ៦៤,២ភាគរយ បើធៀបនឹងកាលពីឆ្នាំ ២០២១ មុនពេលផ្ទុះសង្រ្គាមរុស្ស៊ី -អ៊ុយក្រែន ។

ដោយឡែក ពាក់កណ្តាលនៃការនាំចេញប្រេង និងប្រេងសាំងរុស្ស៊ីនៅក្នុងឆ្នាំ ២០២៣ ត្រូវបានដឹកជញ្ជូនទៅកាន់ប្រទេសចិន ស្របពេលក្រុមមេដឹកនាំ និងក្រុមមន្រ្តីមកពីប្រទេសទាំង ២ដែលបានចូលរួមកិច្ចប្រជុំទ្វេភាគីជាច្រើនលើក កាលពីឆ្នាំមុន បានកើតសរសើរដល់ភាពជាដៃគូគ្មានដែនកំណត់របស់ពួកគេ ៕