អ្នកនាំពាក្យយោធាហ៊ូធី បាននិយាយនៅថ្ងៃសុក្រនេះថា ការវាយប្រហារ ៧៣លើក បានសម្លាប់សកម្មប្រយុទ្ធរបស់ពួកគេចំនួន ៥នាក់ និងសកម្មប្រយុទ្ធ ៦នាក់ផ្សេងទៀត រងរបួស ក្រោយសហរដ្ឋអាមេរិក និងអង់គ្លេស បើកការវាយប្រហារពេលយប់លើគោលដៅយោធារបស់ចលនាមួយនេះ នៅក្នុងប្រទេសយេម៉ែន ជាការឆ្លើយតបនឹងការវាយប្រហារលើនាវាពាណិជ្ជកម្មនៅក្នុងសមុទ្រក្រហម ។

លោក Yahya Sarea គឺជាអ្នកនាំពាក្យក្រុមឧទ្ទាមហ៊ូធី និយាយថា ការវាយប្រហារនេះ នឹងមិនធ្វើឡើងដោយគ្មានការដាក់ទោស ឬសងសឹកនោះឡើយ ហើយក្រុមឧទ្ទាមរបស់ពួកយើងនឹងបន្តវាយប្រហារលើគោលដៅនាវាដែលធ្វើដំណើរទៅកាន់ប្រទេសអ៊ីស្រាអែល ។

គួរឲ្យដឹងថា ក្រុមឧទ្ទាមហ៊ូធី ដែលជាចលនាប្រដាប់អាវុធគ្រប់គ្រងតំបន់ភាគច្រើននៅប្រទេសយេម៉ែននារយៈពេល ១ទសវត្សរ៍កន្លងមកនេះ បានវាយប្រហារលើគោលដៅនាវាដឹកជញ្ជូននៅច្រកសមុទ្រក្រហម ដែលស្ថិតនៅក្នុងផ្លូវពាណិជ្ជកម្មដ៏មមាញឹកជាងគេបំផុតនៅលើពិភពលោក ចាប់តាំងពីខែតុលារហូតមក ដើម្បីគាំទ្រដល់ក្រុមចលនាហាម៉ាស់នៅក្នុងតំបន់ហ្គាហ្សា ។

ក្រុមសាក្សីនៅក្នុងប្រទេសយេម៉ែន បានបញ្ជាក់ពីការផ្ទុះគ្រាប់ទូទាំងប្រទេស ដោយពួកគេនិយាយថា ការវាយឆ្មក់នេះ មានគោលដៅលើមូលដ្ឋានយោធា ស្ថិតនៅជិតកំពង់ផែក្រុង Sanaa មូលដ្ឋានទ័ពជិតអាកាសយានដ្ឋាន Taiz មូលដ្ឋានកងទ័ពជើងទឹកក្រុមឧទ្ទាមហ៊ូធី នៅទីក្រុង Hodeidah និងមូលដ្ឋានទ័ពស្ថិតនៅក្នុងខេត្ត Hajjah ។

ខណៈពេលនោះដែរ រដ្ឋមន្រ្តីក្រសួងការពារជាតិរបស់ចក្រភពអង់គ្លេសលោក James Heappey បាននិយាយនៅក្នុងសេចក្តីថ្លែងការណ៍ថា ការចង្អុលបង្ហាញដំបូងគឺថាសមត្ថភាពរបស់ក្រុមហ៊ួធី ក្នុងការគំរាមកំហែងការដឹកជញ្ជូនទំនិញក្នុងសមុត្រ បានរងផលប៉ះពាល់ខ្លាំង ។

ដោយឡែក អ៊ីរ៉ង់ ដែលគាំទ្រក្រុមប្រដាប់អាវុធនៅជុំវិញតំបន់មជ្ឈិមបូព៌ា រួមទាំងក្រុមឧទ្ទាមហ៊ូធី និងក្រុមហាម៉ាស់ បានថ្កោលទោសការវាយប្រហាររបស់សហរដ្ឋអាមេរិក និងអង់គ្លេស ៕