គ្រូពេទ្យផ្នែកសរសៃប្រសាទដែលមានការហត់នឿយគឺនាង ណាសឡា អាប៊ូចាមីអ៊ី(Najla Abu Jameé) កំពុងតស៊ូដើម្បីជួយជនរងគ្រោះពីការវាយប្រហារថ្មើរជើង និងការទម្លាក់គ្រាប់បែករបស់អ៊ីស្រាអែលនៅឯ មន្ទីរពេទ្យអឺរុប ក្នុងក្រុងខាន យូនីស។

សម្រាប់នាងណាសឡា ដែលបានបាត់បង់ទីជម្រកជាមួយនឹងកូនពីរនាក់ និងប្អូនស្រីនោះ មន្ទីរពេទ្យដែលនាងធ្វើការនេះ បានក្លាយជាកន្លែងស្នាក់អាស្រ័យរបស់នាងផងដែរ។

នៅក្នុងការផ្ដល់បទសម្ភាសន៍មួយជាមួយអ្នកសារព័ត៌មាន Reuters កាលពីថ្ងៃព្រហស្បតិ៍ នាងណាសឡាបានរៀបរាប់ថា ស្ថានភាពធ្ងន់ធ្ងរ បានធ្វើអោយមន្ទីរពេទ្យរបស់នាង កំពុងខ្វះខាត ដូចជា បរិក្ខារវេជ្ជសាស្រ្ដ ឧបករណ៍ប្រើប្រាស់ បង់រុំរបួស ម្នាងសិលា ហើយសូម្បីតែរបស់ងាយៗក៏ពិបាករកដែរ។

នាងក៏បាននិយាយផងដែរថា មានការខ្វះខាតបុគ្គលិកពេទ្យយ៉ាងច្រើន ហើយមានតែវេជ្ជបណ្ឌិតតែម្នាក់គត់ដែលជារឿយធ្វើការក្នុងវេន២៤ម៉ោង។

នាងបាននិយាយថា លំហូរអ្នកជម្ងឺ គឺច្រើនលើសគ្រែមន្ទីរពេទ្យ និងសមត្ថភាពបន្ទប់វះកាត់។ ចំណែក អ្នករបួសធ្ងន់ត្រូវបានព្យាបាលនៅលើឥដ្ឋ ហើយជារឿយៗមិនមានថ្នាំសណ្ដំប្រើប្រាស់ទេ។

ជោគវាសនាមន្ទីរពេទ្យនានា ក្នុងតំបន់ហ្កាហ្សា ស្រ្ទីប និងស្ថានភាពលំបាកនៃគ្រូពេទ្យបឋមសង្គ្រោះដែលធ្វើការក្រោមការទម្លាក់គ្រាប់បែក ការដាច់ចរន្ដអគ្គីសនីជាញឹកញាប់ និងការស្ដុកទុកថ្នាំក្នុងឃ្លាំង មិនគ្រប់គ្រាន់ បានធ្វើអោយអង្គការសហប្រជាជាតិព្រួយបារម្ភពីការដួលរលំប្រព័ន្ធសុខាភិបាលទាំងស្រុង៕