តម្លៃប្រេងបានហក់ឡើងជាង ៤ភាគរយ នៅថ្ងៃសុក្រ (ទី១២ ខែមករា) នេះ ដោយការឡើងថ្លៃនេះបានកើតឡើងបន្ទាប់ពីសហរដ្ឋអាមេរិក និងអង់គ្លេសបានវាយប្រហារលើគោលដៅយោធារបស់ក្រុមហួទី ក្នុងប្រទេសយេម៉ែន។

នោះជាការឆ្លើយតបចំពោះការវាយប្រហារពីសំណាក់ក្រុមដែលគាំទ្រដោយអ៊ីរ៉ង់មួយនេះលើការដឹកជញ្ជូន នៅសមុទ្រក្រហម។ ការវាយប្រហារនេះបានធ្វើឲ្យការព្រួយបារម្ភទីផ្សារមានកាន់ខ្លាំងឡើងអំពីផលប៉ះពាល់ដែលអាចកើតមាននៃជម្លោះកាន់តែធំទៅៗ នៅមជ្ឈិមបូព៌ា។ ជាមួយគ្នានេះ មានការព្រួយបារម្ភអំពីការផ្គត់ផ្គង់ប្រេងពីតំបន់នេះ ជាពិសេសប្រេងដែលដឹកឆ្លងកាត់ច្រកសមុទ្រដ៏សំខាន់ Hormuz។

ការវាយប្រហាររបស់សហរដ្ឋអាមេរិក និងអង់គ្លេស បានបង្ហាញពីការរីករាលដាលនៃសង្រ្គាម រវាងអ៊ីស្រាអែល និងក្រុមហាម៉ាស ចាប់តាំងពីអណ្ដាតភ្លើងសង្គ្រាមនេះ បានឆាបឆេះឡើង កាលពីខែតុលា។ សាក្សីនៅយេម៉ែនបានបញ្ជាក់អះអាងពីការផ្ទុះជាច្រើន នៅទូទាំងប្រទេស។

អ្នកនាំពាក្យរបស់ក្រុមហួទី បាននិយាយថា ក្រុមនេះនឹងបន្តកំណត់គោលដៅលើការដឹកជញ្ជូនឆ្ពោះទៅកាន់ប្រទេសអ៊ីស្រាអែល។ ការវាយប្រហារបានរំខានដល់ពាណិជ្ជកម្មអន្តរជាតិតាមច្រកឆ្លងកាត់ដ៏សំខាន់ រវាងអឺរ៉ុប និងអាស៊ី។ ផ្លូវទឹកនោះមានប្រហែល ១៥ភាគរយនៃចរាចរដឹកជញ្ជូនរបស់ពិភពលោក។

បន្ទាប់ពីក្រុមហួទីបានវាយប្រហារលើនាវាពាណិជ្ជកម្មនៅសមុទ្រក្រហម ដើម្បីបង្ហាញការគាំទ្រដល់ក្រុមសកម្មប្រយុទ្ធហាម៉ាសប៉ាឡេស្ទីន ក្នុងការប្រយុទ្ធប្រឆាំងនឹងអ៊ីស្រាអែល ក្រុមហ៊ុនដឹកជញ្ជូនដ៏ធំបំផុត Maersk និងក្រុមផ្សេងទៀតបានបង្វែរផ្លូវធ្វើដំណើរនៃនាវារបស់ខ្លួនចេញពីសមុទ្រក្រហម ហើយបានព្រមានពីការរំខានបន្ថែមទៀត៕