បាល់ទាត់​៖ ​ក្រុម​ជើងឯក Copa America ៩​សម័យ​ប្រេ​ស៊ី​ល​នៅតែ​រក្សា​ស្ថិតិ​ឈ្នះ​រហូត​របស់​ខ្លួន​ក្នុង​ពូ​ល ​បន្ទាប់ពី​វាយបក​យក​ឈ្នះ​កូ​ឡុំ​ប៊ី ២-១ ប្រកួត​ទី​៣ ​ក្នុង​ពូ​ល B នេះ​។

​​បន្ទាប់ពី​យកឈ្នះ​វេ​ណេ​ហ្សុ​យ​អេ​ឡា ៣-០ ប្រកួត​ដំបូង, យកឈ្នះ​ប៉េរូ ៤-០ ប្រកួត​ទី​២ ឈាន​ដល់​ប្រកួត​ទី​៣ នេះ ប្រេ​ស៊ី​ល​របូត​គ្រាប់​បាល់​ដំបូង​នៅ Copa America ឆ្នាំនេះ​នៅ​ពេល Luiz Diaz បើក​ការ​នាំមុខ​ឲ្យ​កូ​ឡុំ​ប៊ី​តាំងពី​នាទី​ទី​១០ និង​នាំមុខ​រហូត​ជិត​ចប់​ការប្រកួត​។ ​​ឈាន​ដល់​នាទី​ទី​៧៨ ខ្សែប្រយុទ្ធ Liverpool, Roberto Firmino គឺជា​អ្នករក​គ្រាប់​តាម​ស្មើ​បាន​សំរេច​ឲ្យ​ប្រេ​ស៊ី​ល ​ដែល​ជា​គ្រាប់​បាល់​ដ៏​ចម្រូងចម្រាស​ ពោល​គឺ​ក្រុម​កូ​ឡុំ​ប៊ី​នាំគ្នា​តវ៉ា​ដោយ​បាល់​នេះ​ប៉ះ​នឹង​អាជ្ញា​កណ្ដាល ​តែ​លោក Nestor Pitana រៀប​នឹង​ផ្លុំ​កញ្ចែ​ទៅ​ហើយ តែ​បាល់​ចំណេញ​ទៅ​ខាង​ប្រេ​ស៊ី​ល​ក៏​បន្ត​ឱ្យ​លេង​រហូត​មាន​គ្រាប់​បាល់​។ ​​កីឡាករ​របស់​កូ​ឡុំ​ប៊ី​បាន​តវ៉ា​ជាច្រើន​នាទី និង​មានការ​ប៉ះទង្គិច​គ្នា​ដែរ ហើយ​ការប្រកួត​នៅតែ​បន្ត​បាន​ដោយ​អាជ្ញា​កណ្តាល ​ក៏​បន្ថែម​ម៉ោង​បង្គ្រប់ច្រើន​នាទី​ដែរ​។

​​ឈាន​ដល់​នាទី​ទី៩០+១០ ទៅ​ហើយ​ប្រេ​ស៊ី​ល​ក៏​រក​បាន​គ្រាប់​ជ័យជំនះ​ដោយ Casemiro​។ ​ជ័យជំនះ​នេះ​ធ្វើ​ឲ្យប្រេ​ស៊ី​លប​ន្ត​ឈរ​លើ​គេ​ក្នុង​ពូ​ល B នេះ​មាន ៩ពិន្ទុ​ពេញ​ពី​ការប្រកួត ៣​លើក ​ខណៈ​កូ​ឡុំ​ប៊ី​នៅតែ​ឈរ​លេខ២ មាន ៤​ពិន្ទុ​តែ​មាន​កៅអី​នៅ​ជុំ​បន្ត​រួចហើយ​។ ​​ចំណែក​មួយ​គូ​ទៀត​ក្នុង​ពូ​ល​នេះ​ដែរ​ ប៉េរូ​វាយបក​តាម​ស្មើ​អេ​ក្វា​ដ័​រ ២-២ បន្ទាប់ពី​អេ​ក្វា​ដ័​រ​នាំមុខ​ពីរ​គ្រាប់​មុន​នៅ​វគ្គ​ទី១​។ ​ពីរ​ក្រុម​នេះ​រួម​ជាមួយ​វេ​ណេ​ហ្សុ​យ​អេ​ឡា​ មិនទាន់​អស់​ឱកាស​ទៅ​ជុំ​បន្ត​នៅ​ឡើយ​ដោយ​រង់ចាំ​ប្រកួត​ចុងក្រោយ​៕

​អត្ថបទ​៖​នាង សុភា​វុ​ធ