កងកម្លាំងប្រដាប់អាវុធរបស់ប្រទេសអេក្វាឌ័រ បានបង្កើនការល្បាត និងការស្វែងរក នៅក្នុងតំបន់ជិតខាងនានាដែលគ្រោះថ្នាក់បំផុតនៅទីក្រុង Guayaquil កាលពីថ្ងៃសុក្រ បន្ទាប់ពីទីក្រុងនេះ ត្រូវបានធ្វើឲ្យរង្គោះរង្គើដោយរលកនៃអំពើហិង្សា។

ទោះបីជាពលរដ្ឋមួយចំនួននៃស្រុក Portete បានស្វាគមន៍ចំពោះចំណាត់ការនេះក៏ដោយ ប៉ុន្តែពលរដ្ឋផ្សេងទៀត មានប្រតិកម្មអវិជ្ជមានចំពោះវត្តមានរបស់នគរបាល។ លោក Edison Medina អធិការនគរបាលស្រុក Portete បាននិយាយថា ការនៅជិតរបស់តំបន់នេះទៅនឹងកំពង់ផែសមុទ្រ ធ្វើឱ្យវាងាយនឹងមានសកម្មភាពឧក្រិដ្ឋកម្ម និងការតស៊ូដណ្តើមអំណាចរវាងក្រុមជនអន្ធពាល។

រដ្ឋាភិបាលបាននិយាយថា ការកើនឡើងអំពើហិង្សាយ៉ាងខ្លាំងនៅក្នុងប្រទេសអេក្វាឌ័រ ក្នុងសប្តាហ៍នេះ រួមមានទាំងការសម្រុកចូលស្ថានីយ៍ទូរទស្សន៍ ការចាប់បុគ្គលិកពន្ធនាគារចំនួន ១៧៨នាក់ជាចំណាប់ថ្នូរធ្វើឡើងដោយអ្នកទោស និងការចាប់ពង្រត់មន្រ្តីនគរបាល ដែលទំនងជាការឆ្លើយតបដោយក្រុមជនអន្ធពាល ចំពោះផែនការរបស់ប្រធានាធិបតី លោក Daniel Noboa ដើម្បីដោះស្រាយស្ថានការណ៍សន្តិសុខធ្ងន់ធ្ងរ។

នគរបាល និងកងទ័ពរបស់ប្រទេសអេក្វាឌ័រ បានបង្កើនប្រតិបត្តិការសន្តិសុខនៅទូទាំងប្រទេស បន្ទាប់ពីមានការកើនឡើងអំពើហិង្សាយ៉ាងខ្លាំងក្នុងសប្តាហ៍នេះ។

កងកម្លាំងប្រដាប់អាវុធ បាននិយាយនៅក្នុងសេចក្តីថ្លែងការណ៍ថា ពួកគេបានចាប់ខ្លួនមនុស្សចំនួន ២២ នាក់ក្នុងការវាយឆ្មក់ជាច្រើនលើក និងរឹបអូសបានអាវុធចំនួន ១៥ ដើម។

លោក Noboa ដែលបានចូលកាន់តំណែងកាលពីខែវិច្ឆិកា បានប្រកាសដាក់ប្រទេសក្នុងគ្រាអាសន្ន និងបានដាក់ឈ្មោះក្រុមជនអន្ធពាលចំនួន ២២ នាក់ ថាជាអង្គការភេរវកម្ម។