ប្រទេសអ៊ុយក្រែន និងចក្រភពអង់គ្លេស កាលពីថ្ងៃសុក្រ បានពង្រឹងទំនាក់ទំនងរបស់ពួកគេ ដោយការចុះហត្ថលេខាលើកិច្ចព្រមព្រៀងសន្តិសុខនៅទីក្រុងគីវ។

ប្រធានាធិបតីលោលោក Volodymyr Zelenskiy បាននិយាយថា វានឹងនៅតែកើតមាន រហូតដល់អ៊ុយក្រែន ចូលរួមជាមួយសម្ព័ន្ធយោធាណាតូ ដោយចាត់ទុកថាវាជា «កិច្ចព្រមព្រៀងសន្តិសុខមិនធ្លាប់មានពីមុនមក»។ កិច្ចព្រមព្រៀងនេះ បានដាក់ចេញការគាំទ្រ ដែលទីក្រុងឡុងដ៍្រ នឹងបន្តផ្តល់ រួមទាំងការចែករំលែកព័ត៌មានសម្ងាត់ ការបណ្តុះបណ្តាលផ្នែកវេជ្ជសាស្រ្ត និងយោធា និងកិច្ចសហប្រតិបត្តិការឧស្សាហកម្មការពារជាតិ។ ក្នុងដំណើរទស្សនកិច្ចទៅកាន់ទីក្រុងគីវ នាយករដ្ឋមន្ត្រីអង់គ្លេសលោក Rishi Sunak បានបង្កើនជំនួយហិរញ្ញវត្ថុរបស់ចក្រភពអង់គ្លេសរហូតដល់ ២,៥ ពាន់លានផោន ដែលជាការកើនឡើងពីចំនួន ២០០ លានផោន កាលពី ពីរឆ្នាំមុន។

លោក Sunak និយាយថា នេះនឹងរួមបញ្ចូលឧបករណ៍ការពារដែនអាកាសកាន់តែច្រើន សព្វាវុធប្រឆាំងរថក្រោះបន្ថែម មីស៊ីលរយៈចម្ងាយឆ្ងាយកាន់តែច្រើន គ្រាប់រំសេវ និងកាំភ្លើងធំរាប់ពាន់គ្រាប់ ការបណ្តុះបណ្តាលសម្រាប់ទាហានស្រីអ៊ុយក្រែនរាប់ពាន់នាក់បន្ថែមទៀត និងជំនួយ២០០លានផោនដើម្បីកសាងយានដ្រូនបន្ថែមទៀត ជាកញ្ចប់ធំបំផុតតែមួយគត់នៃយានដ្រូនដែលត្រូវផ្តល់ទៅឱ្យអ៊ុយក្រែន ដោយប្រទេសតែមួយ។ ជាមួយនឹងការវាយលុករបស់រុស្ស៊ី លើអ៊ុយក្រែនខិតជិតដល់អាយុកាល ២ ឆ្នាំ ដំណើរទស្សនកិច្ចនេះ បានមកដល់ចំណុចប្រសព្វដ៏សំខាន់មួយ។ មេបញ្ជាការកងទ័ពជើងគោកអ៊ុយក្រែន លោក Oleksandr Syrskiy បានប្រាប់សារព័តមានរ៉យទ័រ កាលពីថ្ងៃសុក្រថា ក្រុងគីវ ត្រូវការយន្តហោះយោធាបន្ថែមទៀតសម្រាប់កិច្ចប្រឹងប្រែងធ្វើសង្គ្រាមរបស់ខ្លួន ដូចជាយន្តហោះវាយប្រហាររបស់សហរដ្ឋអាមេរិក ដើម្បីគាំទ្រដល់កងទ័ពថ្មើរជើង និងយន្តហោះដែលអាចបាញ់មីស៊ីលរយៈចម្ងាយឆ្ងាយ។