ពោធិ៍សាត់៖ ក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់ ហៅកាត់ថា (PWG) បានបើកកិច្ចបរជុំបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ស្តីពីការផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់ ។ កិច្ចប្រជុំនេះដឹកនាំដោយ

ឯកឧត្តម ឡាយ វិសិដ្ឋ អភិបាលរងខេត្តនិងជាប្រធានក្រុមការងារ និងដោយមានការចូលរួមពីលោក ខែម សុខុនប្រធានសម្របសម្រួលអង្គការដៃគូរ លោក ធីម សុធារ៉ា ប្រធានមន្ទីរអភិវឌ្ឍន៍ជនបទ តំណាងរដ្ឋបាលក្រុង-ស្រុកតាំង៧ តំណាងអង្គការនានាជាសមាជិក (PWG) និងអង្គភាពមន្ទីរជំនាញពាក់ព័ន្ធ ។

គោលបំណងនៃកិច្ចប្រជុំនេះ គឺដើម្បីពិនិត្យមើលពីការអនុវត្តន៍ ការទទួលខុសត្រូវការងារផ្គត់ផ្គង់ទឹក និងអនាម័យជនបទក្នុងខេត្តពោធិ៍សាត់ រួមនិងនិងការចែករំលែកបទពិសោធន៍ ពិភាក្សាពិគ្រោះយោបល់លើផលប៉ះពាល់អវិជ្ជមាន នៃកង្វះការផ្គត់ផ្គង់ទឹកស្អាតនិងអនាម័យជនបទក្នុងខេត្តពោធិ៍សាត់ ពីគ្រប់ភាគីពាក់ព័ន្ធទាំងអស់ ដើម្បីសម្រេចអោយបាននូវទស្សនៈវិស័យរបស់រាជរដ្ឋាភិបាល “នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវទទួលបានកាតផ្គត់ផ្គង់ទឹកស្អាតនិងអនាម័យប្រើប្រាស(១០០%)ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព” ។

បើតាមរបាយការណ៍របស់លោក លោក ធីម សុធារ៉ា ប្រធានមន្ទីរអភិវឌ្ឍន៍ជនបទ និងជាប្រធានលេខាធិការដ្ឋាន(PWG) បានអោយដឹងថាសម្រាប់ក្នុងឆ្នាំ២០២៣ ក្រុមការងារបច្ចេកទេសវិស័យផ្គត់ផ្គង់ទឹកស្អាត និងការលើកកម្ពស់អនាម័យជនបទខេត្តពោធិ៍សាត់ និងក្រុមលេខាធិការដ្ឋាន (PWG) ដែលមានមន្ទីរអភិវឌ្ឍន៍ជនបទជាសេនាធិការ សម្រេចបានលទ្ធផលសរុបរួមក្នុងខេត្តពោធិ៍សាត់ លើវិស័យផ្គត់ផ្គង់ទឹកស្អាតបាន៨៧,១៤ភាគរយ និងវិស័យអនាម័យជនបទបាន៨៤ភាគរយ ។ ក្នុងនោះដែរលទ្ធផលតាមស្រុក-ក្រុងទាំង៧រួមមាន ៖

-ស្រុកបាកាន   វិស័យផ្គត់ផ្គង់ទឹកស្អាតបាន៨៥,០៣% វិស័យអនាម័យបាន៨៣%

-ស្រុកកណ្តៀង   វិស័យផ្គត់ផ្គង់ទឹកស្អាតបាន៨៥,៩២% វិស័យអនាម័យបាន៨២%

-ស្រុកក្រគរ    វិស័យផ្គត់ផ្គង់ទឹកស្អាតបាន៨៦,០៣% វិស័យអនាម័យបាន៨០%

-ស្រុកតាលោ    វិស័យផ្គត់ផ្គង់ទឹកស្អាតបាន៨៧,៨០% វិស័យអនាម័យបាន៩៥%

-ស្រុកវាលវែង    វិស័យផ្គត់ផ្គង់ទឹកស្អាតបាន៨០,០២% វិស័យអនាម័យបាន៦៥%

-ស្រុកភ្នំក្រវាញ    វិស័យផ្គត់ផ្គង់ទឹកស្អាតបាន៩២,៨៩% វិស័យអនាម័យបាន៩៥%

-ក្រុងពោធិ៍សាត់   វិស័យផ្គត់ផ្គង់ទឹកស្អាតបាន៩២,២២% វិស័យអនាម័យបាន៩៥%

ឯកឧត្តម ឡាយ វិសិដ្ឋ ក្នុងនាមប្រធានក្រុមការងារ(PWG)ខេត្តពោធិ៍សាត់ បានលើកឡើងថា មូលដ្ឋានភូមិ-ឃុំមួយចំនួនក្នុងខេត្តស្ថិតក្នុងតំបន់ភ្នំ និងនៅលើផ្ទៃទឹកដែលមានឧបសគ្គជាច្រើនក្នុងការអនុវត្តការងារផ្គត់ផ្គង់ទឹក និងអនាម័យជនបទ ដូចនេះក្រុមការងារ(PWG) មន្ទីរពាក់ព័ន្ធ អង្គការដៃគូរ ក៏ដូចជាអាជ្ញាធរមូលដ្ឋានត្រូវបន្តធ្វើការសហការគ្នា

យកចិត្តទុកដាក់ដោះស្រាយ ដើម្បីសម្រេចអោយបានតាមផែនការយុទ្ធសាស្ត្រជាតិ ។ ក្នុងនោះដែរក្នុងឆ្នាំ២០២៤ យើងនឹងសម្រេចអោយបាន ស្រុកតាលោសែនជ័យ ជាស្រុកបញ្ឈប់ការបន្ទោបង់ពាសវាលពាលកាល ហើយក្នុងឆ្នាំ២០២៥ នឹងសម្រេចអោយបាន ស្រុកភ្នំក្រវាញ ជាស្រុកបញ្ឈប់ការបន្ទោបង់ពាសវាលពាលកាល ៕ អត្ថបទ ៖ ភិរុណ ពៅ