អ្នកវិទ្យាសាស្ត្របានព្រមានអំពីនិន្នាការ «ដ៏គួរឲ្យភ្ញាក់ផ្អើល» នៃការឡើងក្ដៅខ្លាំង បន្ទាប់ពីឆ្នាំ២០២៣ បានក្លាយជាឆ្នាំដែលមានអាកាសធាតុក្តៅបំផុត នៅលើពិភពលោក ក្នុងកំណត់ត្រា។

នៅក្នុងការវិភាគអាកាសធាតុពិភពលោកប្រចាំឆ្នាំ រដ្ឋបាលមហាសមុទ្រ និងបរិយាកាសជាតិ ហៅកាត់ថា NOAA នៅសហរដ្ឋអាមេរិក បានអះអាងពីការរកឃើញរបស់អ្នកវិទ្យាសាស្ត្រសហភាពអឺរ៉ុបថា ឆ្នាំ២០២៣ គឺជាឆ្នាំដ៏ក្តៅបំផុត ចាប់តាំងពីកំណត់ត្រានេះ បានចាប់ផ្តើមនៅឆ្នាំ១៨៥០ ដោយមានកម្ដៅ ១,៣៥អង្សាសេ ពោលគឺលើសពីមធ្យមភាគមុនកម្រិតឧស្សាហកម្ម។

អង្គការឧតុនិយមពិភពលោក (WMO) ក៏បានបញ្ជាក់ផងដែរថា ឆ្នាំ២០២៣ គឺជាឆ្នាំក្ដៅបំផុតផងដែរ កាលពីថ្ងៃសុក្រ (ទី១២ ខែមករា) ហើយបាននិយាយថា ពិភពលោកបានឡើងកម្ដៅ ១,២អង្សាសេ ពោលគឺលើសពីមធ្យមភាគមុនឧស្សាហកម្ម ដោយផ្អែកលើសីតុណ្ហភាពមធ្យមភាគរបស់ពិភពលោករយៈពេល ១០ឆ្នាំ ពីឆ្នាំ២០១៤ ដល់ឆ្នាំ២០២៣។

កំណត់ត្រានេះអាចនឹងធ្វើឲ្យមានបម្រែបម្រួលអាកាសធាតុ ដែលជំរុញដោយការដុតឥន្ធនៈហ្វូស៊ីល រួមនឹងបាតុភូតអាកាសធាតុ El Nino ដែលកើតឡើងនៅពាក់កណ្តាលឆ្នាំ។ NOAA បាននិយាយថា មានឱកាសមួយក្នុងចំណោម៣ ដែលឆ្នាំ២០២៤ នឹងក្តៅជាងឆ្នាំ២០២៣ ហើយឱកាស ៩៩ភាគរយ ដែលវានឹងជាប់ចំណាត់ថ្នាក់ក្នុងចំណោមចំណាត់ថ្នាក់អាកាសធាតុក្តៅបំផុត ក្នុងកំណត់ត្រា៕