ប្រព័ន្ធផ្សព្វផ្សាយរដ្ឋរបស់អ៊ីរ៉ង់ កាលពីថ្ងៃសុក្រ (១២ មករា) បានចាក់ផ្សាយវីដេអូ ដែលខ្លួនបាននិយាយថា បង្ហាញពីនាវាដឹកប្រេងមួយគ្រឿងត្រូវបានរឹបអូស នៅឈូងសមុទ្រអូម៉ង់ ដោយកងកម្លាំងជើងទឹករបស់អ៊ីរ៉ង់។

ក្រុមបុករុកប្រដាប់អាវុធបានឡើងនាវា St Nikolas ដែលមានទង់ជាតិរបស់ប្រជុំកោះ Marshall នៅពេលនាវានេះធ្វើដំណើរនៅជិតទីក្រុង Sohar របស់ប្រទេសអូម៉ង់ កាលពីថ្ងៃព្រហស្បតិ៍ (១១ មករា) ខណៈដែលដឹកប្រេងឆៅអ៊ីរ៉ាក់ទៅកាន់ប្រទេសទួរគី។

ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍ថា សកម្មភាបនេះគឺជាការសងសឹកចំពោះការរឹបអូស កាលពីឆ្នាំមុន ចំពោះនាវាដូចគ្នានេះ និងប្រេងរបស់នាវា ពីសំណាក់សហរដ្ឋអាមេរិក ដោយទង្វើនេះទំនងជាបង្កឲ្យមានភាពតានតឹងក្នុងតំបន់។

យោងតាមក្រុមហ៊ុនសន្តិសុខដែនសមុទ្ររបស់អង់គ្លេស Ambrey ប្រព័ន្ធតាមដាន AIS របស់ខ្លួន ត្រូវបានបិទ នៅពេលដែលនាវាធ្វើដំណើរឆ្ពោះទៅកាន់កំពង់ផែ Bandar-e-Jask របស់អ៊ីរ៉ង់។ ការរឹបអូសយកនាវា St Nikolas កើតមានឡើងស្របពេលជាមួយនឹងការវាយប្រហារជាច្រើនសប្តាហ៍ ដោយកងជីវពលហួទីគាំទ្រដោយអ៊ីរ៉ង់របស់យេម៉ែន ដែលផ្តោតលើផ្លូវដឹកជញ្ជូនសមុទ្រក្រហម។

សហរដ្ឋអាមេរិកបានរឹបអូសយកនាវា St Nikolas កាលពីឆ្នាំមុន នៅក្នុងប្រតិបត្តិការអនុវត្តទណ្ឌកម្ម នៅពេលដែលនាវាបានធ្វើដំណើរក្រោមឈ្មោះផ្សេង គឺ Suez Rajan។ អ៊ីរ៉ង់បានព្រមានអាមេរិកថា ទង្វើនេះនឹងមិនអាចកើតឡើងដោយមិនមានការឆ្លើយតបនោះទេ៕