កូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលរយៈចម្ងាយមធ្យម ពីឆ្នេរភាគខាងកើតរបស់ខ្លួននៅថ្ងៃអាទិត្យ (១៤ មករា) នេះខណៈភាពតានតឹងបានកើនឡើងបន្ទាប់ពីការបាញ់បង្ហោះមីស៊ីលបាលិស្ទិកអន្តរទ្វីបថ្មីៗរបស់ក្រុងព្យុងយ៉ាង និងផ្កាយរណបចារកម្មយោធាដំបូងរបស់ខ្លួន។

យោងតាមកងឆ្មាំល្បាតឆ្នេរជប៉ុន បានឲ្យដឹងថា មីស៊ីលដែលកូរ៉េខាងជើងបានបាញ់នោះអាចជាមីស៊ីលបាលិស្ទិក។ ទូរទស្សន៍ NHK បាននិយាយថា មីស៊ីលនោះហាក់ដូចជាបានធ្លាក់ចុះនៅខាងក្រៅតំបន់សេដ្ឋកិច្ចផ្តាច់មុខរបស់ប្រទេសជប៉ុន។

មីស៊ីលនៅថ្ងៃអាទិត្យនេះត្រូវបានបាញ់ចេញពីតំបន់មួយនៃទីក្រុងព្យុងយ៉ាង នៅម៉ោងប្រហែល ២:៥៥នាទីរសៀល (ម៉ោងក្នុងស្រុក) នេះបើតាមយោធាកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយដោយបន្ថែមថាទីក្រុងសេអ៊ូល កំពុងដំណើរការការវិភាគលើមីស៊ីលដោយមានការសម្របសម្រួលជាមួយសហរដ្ឋអាមេរិក និងជប៉ុន។

កូរ៉េខាងជើងបាននិងកំពុងបង្កើនសម្ពាធលើទីក្រុងសេអ៊ូលក្នុងប៉ុន្មានសប្តាហ៍ថ្មីៗនេះ ដោយប្រកាសថាកូរ៉េខាងត្បូងជា «សត្រូវដ៏សំខាន់» និងនិយាយថា កូរ៉េខាងជើងនឹងមិនរួបរួមគ្នាជាមួយកូរ៉េខាងត្បូងឡើយ ហើយប្តេជ្ញាពង្រឹងសមត្ថភាពរបស់ខ្លួនក្នុងការផ្តល់ការវាយប្រហារនុយក្លេអ៊ែរលើសហរដ្ឋអាមេរិក និងបណ្ដាសម្ព័ន្ធមិត្តរបស់អាមេរិកនៅតំបន់ប៉ាស៊ីហ្វិក៕