ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី១៥ ខែមករា ឆ្នាំ២០២៤នេះ បាន​ប្រកាស​បើកបវេសនកាល ទូទាំងប្រទេស ដើម្បីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់​យុវជនមកពីគ្រួសារក្រីក្រ និងងាយរងហានិភ័យ ចំនួន ១លាន ៥សែននាក់។កម្មវិធីនេះ បាន​ប្រព្រឹត្ត​ទៅ​ក្រោម​អធិបតីភាពរបស់ឯកឧត្តម ហេង សួរ រដ្ឋមន្ត្រីក្រសួងការងារ និង​បណ្តុះបណ្តាល​វិជ្ជាជីវៈ។

តាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ ក្នុង​ជំហ៊ាន​ដំបូង​របស់​វគ្គ​បណ្តុះ​បណ្តាល​ជំនាញវិជ្ជាជីវៈ និងបច្ចេកទេសនេះ បានរៀបចំឲ្យមានថ្នាក់សិក្សារហូតចំនួន ៧០០​ថ្នាក់ ស្មើនឹងយុវជនចំនួនជាង ២ម៉ឺននាក់។ វគ្គបណ្តុះបណ្តាល នេះដែរ បាន​កំណត់​យក​មុខ​ជំនាញ​ចំនួន៣៨ នៅក្នុងវិស័យអាទិភាពចំនួន១០ រួមមាន៖ សំណង់ , អគ្គិសនីនិងថាមពល , បរិក្ខា​ត្រជាក់ និងកម្តៅ ,ទេសចរណ៍ , មេកានិកទូទៅ/មេកានិករថយន្ត , សេវាកម្ម , កសិកម្ម និង​កសិ-ឧស្សាហកម្ម , កម្មន្តសាល , អេឡិចត្រូនិច និងធុរកិច្ចនិងព័ត៌មានវិទ្យា។

នៅក្នុងពិធីបើកបវេសនកាលនេះ ឯកឧត្តមរដ្ឋមន្រ្តី បានមានប្រសាសន៍ថា កម្ម​វិធី​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិកភ័យ ជា​ការ​ចង្អុលបង្ហាញរបស់ សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និង​បាន​ប្រកាស​ដាក់​ឲ្យអនុវត្តជាផ្លូវការ នៅថ្ងៃទី១៤ ខែវិច្ឆិកា ឆ្នាំ២០២៣ ដោយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។ ឯកឧត្តម បានបន្តថា រដ្ឋាភិបាល​នឹង​ទទួល​ខុស​ត្រូវ​លើ​ការ​ចំណាយ​ទាំងអស់ ដូចជាថ្លៃសិក្សា និងប្រាក់​ឧបត្ថម្ភ​ប្រចាំ​ខែ​សម្រាប់​ផ្តល់​ការ​បណ្តុះ​បណ្តាល​ជំនាញ​នេះ ដើម្បីឆ្លើយតបនឹងតម្រូវការទីផ្សារការងារ ព្រម​ទាំង​ជួយ​លើក​កម្ពស់​ជីវភាព​របស់​យុវជន ឲ្យកាន់តែប្រសើរជាងមុន។

ក្រុមសិក្ខាកាមដែលទទួលបានការបណ្តុះបណ្តាលជំនាញនេះ បាន​សម្តែង​ការ​អរគុណ​ជូន​ចំពោះ​រាជ​រដ្ឋាភិបាល ដែលដាក់ចេញនូវគោលនយោបាយដ៏មានសារៈសំខាន់មួយនេះ ដើម្បី​ឲ្យ​ពួក​គាត់​មាន​ឱកាសរៀនជំនាញដែលខ្លួនពេញចិត្ត ថែមមានឱកាសការងារទៅថ្ងៃអនាគតផងដែរ តាម​រយៈ​កម្ម​វីធីបណ្តុះបណ្តាលជំនាញនេះ។

ដើម្បីគាំទ្រដល់ការបណ្តុះបណ្តាលជំនាញវិជ្ជាជីវៈ និង​បច្ចេកទេស​ឲ្យ​កាន់​តែ​មាន​ប្រសិទ្ធិភាព​បន្ថែម​ទៀត ក្រសួងការងារ និងបណ្តុះបណ្តាលវិជ្ជាជីវៈ បានចុះ​ហត្ថ​លេខា​លើ​អនុស្ស​រណៈ​នៃ​ការ​យោគ​យល់គ្នា ជាមួយសភាពាណិជ្ជកម្មកម្ពុជា និងសមាគមនិយោជកចំនួន១៧ ដើម្បី​បង្កើត​កិច្ច​សហ​ប្រតិបត្តិការ រវាងវិស័យរដ្ឋ និងវិស័យឯកជន ក្នុងការផ្តល់ជំនាញ បង្កើនជំនាញ ផ្លា​ស់​ប្តូរ​ជំនាញ និងបង្កើនផលិតភាពការងារ ដើម្បីធានាថា ពលរដ្ឋកម្ពុជាមានជំនាញមួយពិតប្រាកដ ដែល​អាច​ទទួលបានការងារ និងមុខរបរសមរម្យ និង​មាន​ស្ថិរភាព​ចំណូល​ស្រប​តាម​ការ​អំពាវ​នាវ​របស់​សម្តេច​នាយករដ្ឋមន្រ្តីកម្ពុជា៕ អត្ថបទ៖ ឈិត បូរ៉ាវី