នាយកដ្ឋានពន្លត់អគ្គិភ័យបានប្រាប់សារព័ត៌មាន AFP កាលពីថ្ងៃអាទិត្យ (១៤ មករា) ថា​ ភ្លៀង​ធ្លាក់​យ៉ាង​ខ្លាំងដែលបានធ្វើឲ្យផ្លូវជន់លិច បានសម្លាប់មនុស្សយ៉ាងហោចណាស់ ១១នាក់ នៅ​ក្នុងរដ្ឋរីអូដេហាណៃរ៉ូ (Rio de Janeiro) ប្រទេសប្រេស៊ីល។

ព្យុះភ្លៀង​នេះបានវាយប្រហារផ្នែកភាគខាងជើងនៃទីក្រុង រីអូ យ៉ាងធ្ងន់ធ្ងរ ជាទីដែល​មា​ន​មនុស្ស​ស្លាប់​ដោ​យសារ​បំណាក់ដី លង់ទឹក និងឆក់ខ្សែភ្លើងជាដើម។ ក្រុមអ្នកពន្លត់​អគ្គិភ័យ​កំពុង​បន្ត​តាម​រក​ស្ត្រីម្នាក់​ដែល​បានបាត់ខ្លួនបន្ទាប់ពីរថយន្តរបស់នាងធ្លាក់ចូលទឹកទន្លេគិតត្រឹមល្ងាចថ្ងៃអាទិត្យ។

អភិបាលក្រុង រីអូ លោក អេដ័រដូ ប៉ាអេស (Eduardo Paes) បានប្រកាសស្ថានភាពនេះថា ជា​«គ្រាអាសន្ន»​ ហើយបានជំរុញឱ្យប្រជាជនស្នាក់នៅផ្ទះដើម្បីសុវត្ថិភាពផ្ទាល់ខ្លួនរបស់ពួកគេ ហើយ​ដើម្បី​កុំឱ្យរំខានដល់កិច្ចខិតខំប្រឹងប្រែងជួយសង្គ្រោះ និងការស្តារឡើងវិញ។

ខ្សែ​រថយន្តក្រុងរាប់សិបត្រូវបានបិទ ហើយស្ថានីយ៍​រថ​ភ្លើង​ក្រោម​ដី​ជា​ច្រើន​ត្រូវ​បាន​បិទ​ដោយ​សារ​តែ​ទឹក​លិចផ្លូវដែក។ ទីភ្នាក់ងារជាតិដែលឃ្លាំមើលគ្រោះមហន្តរាយធម្មជាតិបាននិយាយថា មាន​ហានិភ័យ​ខ្ពស់ នៃ​បំណាក់ដីនៅក្នុងទីក្រុងចំនួនប្រាំបីនៅជុំវិញរដ្ឋ រីអូ ដេ ហាណៃរ៉ូ៕